ដោយ: គង់ លាងហួរ
ភ្នំពេញ: សម្តេចតេជោនាយករដ្ឋមន្ត្រីបានមានប្រសាសន៍ថា លោក ថងលូន ស៊ីសូលីត ប្រធានាធិបតីឡាវ គ្រោងនឹងចូលរួមក្នុងពិធីបើកការប្រកួតកីឡាអាស៊ីអាគ្នេយ៍ (ស៊ីហ្គេម) លើកទី៣២ នៅទីក្រុងភ្នំពេញ ប្រទេសកម្ពុជា នាខែឧសភាខាងមុខនេះ។
សម្តេចតេជោបានធ្វើសេចក្តីប្រកាសនៅថ្ងៃអង្គារនេះ ខណៈសម្តេចបានអញ្ជើញជាអធិបតី ក្នុងពិធីចែកសញ្ញាបត្រ ដល់និស្សិតសាកលវិទ្យាល័យធនធានមនុស្សជាង២០០០នាក់ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ។
សម្តេចតេជោនាយករដ្ឋមន្រ្តីកម្ពុជាបានបន្ថែមថា សម្តេចក៏បានផ្ញើលិខិតអញ្ជើញដល់មេដឹកនាំវៀតណាម ឱ្យចូលរួមក្នុងពិធីបើកការប្រកួតកីឡានេះផងដែរ។
នេះជាលើកដំបូងរបស់កម្ពុជា ដែលធ្វើជាម្ចាស់ផ្ទះនៃការប្រកួតកីឡាស៊ីហ្គេម និងអាស៊ានប៉ារ៉ាហ្គេម។ ហ្គេមទាំងនេះត្រូវបានបង្រួបបង្រួម និងដាក់ឈ្មោះថា “កម្ពុជា២០២៣” ដើម្បីតំណាងឱ្យឯកភាព ភាពចម្រុះ និងសមភាព ហើយពាក្យស្លោករបស់កម្ពុជាឆ្នាំ២០២៣ គឺ “កីឡារស់នៅដោយសន្តិភាព”។
កាលពីសប្តាហ៍មុន សម្តេចតេជោនាយករដ្ឋមន្ត្រី បានបំពេញទស្សនកិច្ចជាផ្លូវការនៅប្រទេសឡាវ បន្ទាប់ពីសម្តេចទទួលបានការអញ្ជើញពីលោកនាយករដ្ឋមន្ត្រីឡាវ Sonexay Siphandone។
នៅក្នុងដំណើរទស្សនកិច្ចនោះ ថ្នាក់ដឹកនាំទាំងពីរក៏បានចុះហត្ថលេខាលើកិច្ចព្រមព្រៀងសំខាន់ៗ និងពិភាក្សាអំពីកិច្ចសហប្រតិបត្តិការទ្វេរភាគីលើវិស័យថាមពល កិច្ចសហប្រតិបត្តិការព្រំដែន ការផ្លាស់ប្តូរទេសចរណ៍ ការតភ្ជាប់ និងការធ្វើបត្យាប័នផងដែរ៕