ដោយ: គង់ លាងហួរ
ភ្នំពេញ: អគ្គនាយកដ្ឋានពន្ធដារកម្ពុជា (GDT) និងវិទ្យាស្ថានសារពើពន្ធ KPMG ដែលជាស្ថាប័នជំនាញអន្តរជាតិផ្នែកគណនេយ្យ សវនកម្ម ប្រឹក្សា និងពន្ធដារ បានធ្វើការពិភាក្សាតុជុំទី១ស្តីពី បច្ចុប្បន្នភាព និងការផ្លាស់ប្តូរសំខាន់ៗនៃច្បាប់ពន្ធថ្មី ការប្រមូលពន្ធ វិធីសាស្រ្ត និងនិន្នាការថ្មី។
លោក អេង រតនា ប្រធាននាយកដ្ឋានអ្នកជាប់ពន្ធធំនៃGDT តំណាងឱ្យ លោក គង់ វិបុល ជាប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក GDT នៅក្នុងកិច្ចពិភាក្សាតុមូលនេះ។
លោក Warrick Cleine នាយកប្រតិបត្តិនៃវិទ្យាស្ថាន KPMG កម្ពុជា និងវៀតណាម មន្ត្រីរដ្ឋាភិបាល ថ្នាក់ដឹកនាំ និងបុគ្គលិកនៃវិទ្យាស្ថាន KPMG ថ្នាក់ដឹកនាំ និងតំណាងសហគ្រាសនានា ក៏មានវត្តមានចូលរួមនៅទីនោះផងដែរ។
ថ្លែងទៅកាន់កិច្ចពិភាក្សាតុមូលនោះ លោក អេង រតនាបានមានប្រសាសន៍ថា “GDT ប្រមូលចំណូលពន្ធបាន៣៤៥៥,១១លានដុល្លារ ដែលស្មើនឹង១២២,៥៤ភាគរយនៃផែនការ ដោយសារសេដ្ឋកិច្ចកម្ពុជាបានងើបឡើងវិញ ពីផលប៉ះពាល់នៃវិបត្តិកូវីដ និងសង្គ្រាមរុស្ស៊ី-អ៊ុយក្រែន។
លោកបានបន្តថា “អភិបាលកិច្ចល្អ ការគ្រប់គ្រងល្អ ភាពជាអ្នកដឹកនាំ និងការគ្រប់គ្រងប្រកបដោយប្រសិទ្ធភាព និងគុណវុឌ្ឍិ គឺជាធាតុស្នូលនៃកំណែទម្រង់ និងទំនើបកម្មនៃ GDT” ។ ធាតុទាំងនេះ បានជួយពង្រឹងដល់ការប្រមូលពន្ធ និងធ្វើឱ្យវាកាន់តែងាយស្រួលសម្រាប់អ្នកជាប់ពន្ធ និងពិបាកក្នុងការជៀសវាងការបង់ពន្ធ។
លោកបញ្ជាក់ថា “កត្តានេះនឹងរួមចំណែកដល់តម្លាភាព ក្នុងការបង់ពន្ធ និងលើកកម្ពស់ការប្រកួតប្រជែងដោយយុត្តិធម៌។ កំណែទម្រង់នេះត្រូវបានទទួលស្គាល់ ដោយរាជរដ្ឋាភិបាល ជាតិ និងសាជីវកម្ម ក្រុមហ៊ុនពហុជាតិ និងស្ថាប័នអន្តរជាតិ ដូចជាធនាគារពិភពលោកផងដែរ”។
កិច្ចពិភាក្សាតុមូលនេះ បានផ្តោតលើការពិភាក្សា លើការធ្វើបច្ចុប្បន្នភាព និងការផ្លាស់ប្តូរសំខាន់ៗ ចំពោះសេចក្តីព្រាងច្បាប់ស្តីពីពន្ធដារថ្មី ដែល GDT កំពុងបញ្ចប់ ការដាក់ឱ្យប្រើប្រាស់ការពន្យារពេលពន្ធ លើប្រាក់ចំណេញ គោលនយោបាយពន្ធអប្បបរមាជាសកល សវនកម្មពន្ធ និងនីតិវិធីដើម្បីប្រឆាំងនឹងការកំណត់ពន្ធ៕