ដោយ: គង់ លាងហួរ
ភ្នំពេញ: ចក្រភពអង់គ្លេសបានសន្យាបន្តជួយដល់កម្ពុជាលើវិស័យផ្សេងៗគ្នា ជាពិសេសសេដ្ឋកិច្ច ពាណិជ្ជកម្ម ការវិនិយោគ ការអប់រំ ហិរញ្ញវត្ថុ ហេដ្ឋារចនាសម្ព័ន្ធ ថាមពលកកើតឡើងវិញ និងបរិស្ថាន ក្នុងគោលបំណងធ្វើឱ្យទំនាក់ទំនង និងកិច្ចសហប្រតិបត្តិការរវាងប្រទេសទាំងពីរកាន់តែស៊ីជម្រៅ។
ការសន្យានេះធ្វើឡើងដោយលោក Dominic Williams ឯកអគ្គរដ្ឋទូតអង់គ្លេស ដែលទើបតែងតាំងថ្មីប្រចាំនៅកម្ពុជា ខណៈលោកបានចូលជួបសម្តែងការគួរសមជាមួយសម្តេចតេជោនាយករដ្ឋមន្ត្រីនៅវិមានសន្តិភាព កាលពីថ្ងៃច័ន្ទម្សិលមិញនេះ។នេះបើយោងតាមលោក អ៊ាង សុផល្លែត ជំនួយការផ្ទាល់របស់សម្តេចតេជោនាយករដ្ឋមន្ត្រី។
លោកឯកអគ្គរដ្ឋទូត Williams បានមានប្រសាសន៍ថា “លោកបានកត់សម្គាល់ពីការអភិវឌ្ឍដ៏ឆាប់រហ័សរបស់ប្រទេសកម្ពុជា បើប្រៀបធៀបទៅនឹងដំណើរទស្សនកិច្ចលើកមុនរបស់លោកកាលពីឆ្នាំ២០១០”។
លោក Dominic Williams បានកោតសរសើរចំពោះការដឹកនាំរបស់សម្តេចតេជោក្នុងការនាំមកនូវសន្តិភាព ស្ថិរភាពដល់ប្រទេសកម្ពុជា ទប់ស្កាត់ការរីករាលដាលនៃជំងឺកូវីដ-១៩ បើកប្រទេស និងសង្គមទាំងមូលឡើងវិញ គ្រប់គ្រងសេដ្ឋកិច្ចកម្ពុជាបានយ៉ាងល្អ និងទទួលបានជោគជ័យក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ព្រមទាំងការយកចិត្តទុកដាក់លើការបោសសម្អាតមីនផងដែរ។
សម្តេចតេជោនាយករដ្ឋមន្ត្រីបានទទួលស្វាគមន៍យ៉ាងកក់ក្តៅចំពោះបេសកកម្មការទូតរបស់លោកឯកអគ្គរដ្ឋទូត Williams ប្រចាំនៅកម្ពុជា និងបានកោតសរសើរលោក ដែលអាចនិយាយភាសាខ្មែរបានយ៉ាងស្ទាត់ជំនាញផងដែរ។
សម្តេចតេជោក៏បានថ្លែងអំណរគុណដល់ចក្រភពអង់គ្លេសចំពោះជំនួយក្នុងប្រតិបត្តិការបោសសម្អាតមីននៅកម្ពុជា និងបានជំរុញការប្តេជ្ញាចិត្តរបស់កម្ពុជាក្នុងការសម្រេចបាននូវគោលដៅប្រទេសគ្មានមីននៅឆ្នាំ២០២៥ ដោយសារតែមានការគាំទ្រធនធានពីសប្បុរសជន និងដៃគូនានា។
លើសពីនេះទៀត សម្តេចតេជោនាយករដ្ឋមន្ត្រីក៏បានសង្កត់ធ្ងន់លើគោលបំណងជំរុញឱ្យមានការបង្កើតសាកលវិទ្យាល័យអង់គ្លេសនៅកម្ពុជា និងជំរុញការវិនិយោគរបស់អង់គ្លេសកាន់តែច្រើនមកកម្ពុជាផងដែរ៕