ថៃ​រំពឹង​ប្រមូលបានប្រាក់​ចំណូល១១៣,៥លានដុល្លារពីសេវាកម្មឯកសាររបស់ភ្ញៀវ​ទេសចរចូលប្រទេសរបស់ខ្លួន

ដោយ: គង់ លាងហួរ

បាងកក: លោក Phiphat Ratchakitprakarn រដ្ឋមន្ត្រីក្រសួងទេសចរណ៍ថៃបានអះអាងថា ប្រទេសថៃនឹងទទួលបានប្រាក់ចំណូលចំនួន៣,៩ពាន់លានបាត (ប្រហែល១១៣,៥៣លានដុល្លារ) បន្ទាប់ពីមានការសម្រេចចិត្តអនុវត្តន៍ ថ្លៃសេវាចំនួន៣០០បាតលើភ្ញៀវទេសចរបរទេស ចាប់ពីថ្ងៃទី១ ខែមិថុនាខាងមុខ។

លោកបានអះអាងបែបនេះ ដោយផ្អែកលើការព្យាករណ៍ថា អ្នកដំណើរចំនួន១៣លាននាក់ នឹងមកទស្សនាប្រទេសថៃ ចាប់ពីថ្ងៃទី១ ខែមិថុនារហូតដល់ចុងឆ្នាំ២០២៣នេះ។

ចាប់ពីថ្ងៃទី១ ខែមិថុនា ភ្ញៀវទេសចរដែលចូលមកប្រទេសថៃ តាមផ្លូវអាកាស នឹងត្រូវគិតថ្លៃសេវា៣០០បាត(ប្រហែល៨,៧៣ដុល្លារ) ចំណែកអ្នកដែលចូលមកប្រទេសថៃ តាមរយៈផ្លូវគោក ឬផ្លូវទឹកត្រូវបង់ថ្លៃ១៥០បាត(ប្រហែល៤,៣៦ដុល្លារ)។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោកបានបន្តថា “នៅក្នុងចំណោមទឹកប្រាក់ចំនួន៣,៩ពាន់លានបាត ក្នុងនោះថវិកា៦៥០លានបាត នឹងត្រូវចំណាយលើការធានារ៉ាប់រងការធ្វើដំណើរសម្រាប់ភ្ញៀវទេសចរ ហើយថវិកា៣,២៥ពាន់លានបាតទៀត ដែ​ល​នៅសល់ នឹងដាក់បញ្ចូលទៅក្នុងមូលនិធិ សម្រាប់ការអភិវឌ្ឍទេស​ចរណ៍”។

លោក Phiphat បានពន្យល់ថា ថ្លៃសេវាចូលប្រទេសថៃចំនួន៣០០បាត នឹងត្រូវបញ្ចូលទៅក្នុងតម្លៃសំបុត្ររបស់ពួកគេ សម្រាប់អ្នកធ្វើដំណើរតាមយន្តហោះ ដោយក្រុមហ៊ុនអាកាសចរណ៍ចែករំលែក៥ភាគរយ នៃថ្លៃសេវាចូលប្រទេសថៃជាថ្លៃប្រតិបត្តិការ។

លោក Phiphat បានបញ្ជាក់ថា “គំនិតនេះគឺអាចធ្វើទៅបាន ហើយអាចអនុវត្តបានទាន់ពេលវេលា ចាប់តាំងពីពេលនេះរដ្ឋាភិបាលកំពុងពិភា​ក្សាជាមួយក្រុមហ៊ុនអាកាសចរណ៍ ដើម្បីប្រមូលថ្លៃសេវាចូលប្រទេសរបស់យើង”។

លោក​បន្ថែម​ថា “ទន្ទឹម​នឹង​នេះ អ្នក​ធ្វើដំណើរ ដែល​ចូល​មកកាន់ប្រទេស​ថៃតាម​ផ្លូវ​គោក ឬ​ផ្លូវ​ទឹក ត្រូវ​បង់​ថ្លៃ​ចូល១៥០បាត តាម​រយៈម៉ាស៊ីន​បញ្ជរ គេហទំព័រ ឬ​កម្មវិធីផ្សេងៗ”៕

LEAVE A REPLY

Please enter your comment!
Please enter your name here