ដោយៈ គង់ ម៉ាលីនណា
ភ្នំពេញៈ ការជំរឿនកសិកម្មទូទាំងប្រទេស នឹងត្រូវធ្វើឡើងចាប់ពីថ្ងៃទី១ ដល់ថ្ងៃទី៣០ ខែមេសា ឆ្នាំ២០២៣ខាងមុខនេះ។
ដើម្បីត្រៀមឆ្ពោះទៅកាន់ការធ្វើជំរឿនកសិកម្ម ប្រកបដោយប្រសិទ្ធភាព លោកបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានដឹកនាំកិច្ចប្រជុំមួយនៅព្រឹកថ្ងៃទី១៥ ខែកុម្ភៈ ឆ្នាំ២០២៣នេះ ដើម្បីត្រៀមបើកវគ្គបណ្តុះបណ្តាលមន្រ្តីត្រួតពិនិត្យ និងមន្រ្តីសម្ភាសន៍នៅតាមរាជធានី-ខេត្ត ពីថ្ងៃទី២៧ ដល់ថ្ងៃទី៣០ ខែមីនា។
លោកបន្តថា “ជំរឿនកសិកម្មនេះ ជាការធ្វើឡើងលើកទី២ បន្ទាប់ពីបានអនុវត្តម្ដងរួចមកហើយកាលពីឆ្នាំ២០១៣”។
លោកទេសរដ្ឋមន្រ្តី ឆាយ ថន ជំរឿនកសិកម្មកម្ពុជាឆ្នាំ២០២៣ ធ្វើឡើង ដើម្បីឆ្លើយតបសេចក្តីត្រូវការប្រើប្រាស់ទិន្នន័យ សម្រាប់ជាធាតុចូលដ៏សំខាន់បំផុត ក្នុងការរៀបចំធ្វើគោលនយោបាយអភិវឌ្ឍន៍វិស័យកសិកម្ម សេដ្ឋកិច្ចបរិស្ថាន សង្គម ការប្រែប្រួលអាកាសធាតុ និងសុខុមាលភាពរបស់ប្រជាជនកម្ពុជា ហើយនិងជាសូចនាករយ៉ាងសំខាន់ សម្រាប់តាមដាន ត្រួតពិនិត្យ វាយតម្លៃលើកម្មវិធីគោលនយោបាយ អភិវឌ្ឍន៍សេដ្ឋកិច្ចរបស់រាជរដ្ឋាភិបាលកម្ពុជា ផែនការយុទ្ធសាស្រ្តអភិវឌ្ឍន៍ជាតិ យុទ្ធសាស្រ្តនៃការលុបបំបាត់ភាពក្រីក្រ និងគោលដៅអភិវឌ្ឍន៍ប្រកបដោយចីរភាពកម្ពុជា ឆ្នាំ២០១៦-២០៣០។
លោកឆាយ ថនបានបន្ថែមថា ការងារជំរឿនកសិកម្មឆ្នាំ២០២៣នេះ ទទួលបានការឧបត្ថម្ភគាំទ្រ ផ្នែកបច្ចេកទេសពីអង្គការស្បៀង និងកសិកម្មនៃអង្គការសហប្រជាជាតិ ( FAO) និងគាំទ្រថវិកាទាំងស្រុងពីរាជរដ្ឋាភិបាលកម្ពុជា និងមានវិសាលភាពធំធេង ដ្បិតការប៉ាន់ស្មានចំនួនប្រជាជនកម្ពុជាមានកំណើនដល់ជាង១៧លាននាក់ ដែលមានប្រមាណ៣,៩លានគ្រួសារ នៅឆ្នាំ២០២៣ និងគ្រួសារប្រកបមុខរបរកសិកម្ម នៅទូទាំប្រទេសកម្ពុជាមានប្រមាណជាង ២,៧លានគ្រួសារ៕