ដោយៈ គង់ ម៉ាលីនណា
ភ្នំពេញៈ កិច្ចប្រជុំបេសកកម្មវាយតម្លៃបឋម(Pre-Appraisal)បានធ្វើឡើងកាលពីថ្ងៃទី១៤ កុម្ភៈ លើគម្រោងកែលម្អការគ្រប់គ្រងសំណល់រឹង និង ផ្លាស្ទិកនៅកម្ពុជា ក្រោមហិរញ្ញប្បទានឥណទានរបស់ធនាគារពិភពលោក។
កិច្ចប្រជុំនេះដឹកនាំដោយលោកកឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារ គម្រោងចូលរួមកិច្ចប្រជុំបេសកកម្មវាយតម្លៃបឋម (Pre-Appraisal) នៃគម្រោងកែលម្អការគ្រប់គ្រង សំណល់រឹង និងផ្លាស្ទិកនៅកម្ពុជា ក្រោមហិរញ្ញប្បទានឥណទានរបស់ធនាគារពិភពលោក ដោយមានការចូលរួមពីលោកស្រីKatelijn van den Berg ប្រធានក្រុមការងារធនាគារពិភពលោកប្រចាំកម្ពុជា លោកស្រី Yewande Awe និងលោក Klaus Sattler សហប្រធានក្រុមការងារធនាគារពិភពលោក និងសហការី។
អង្គប្រជុំបានពិភាក្សាយ៉ាងផុលផុស លើរបៀបវារៈសំខាន់ៗមួយចំនួនរួមមាន ទី១ ការបញ្ចប់លទ្ធផល សូចនាករ និងការរៀបចំធាតុផ្សំសំខាន់ៗនៃសមាសភាគគម្រោងទាំងបី ទី២ ការបញ្ចប់សកម្មភាពការងារ ការចំណាយផ្សេងៗ សម្រាប់សមាសភាគគម្រោងទាំងបី ក្នុងនោះមានសមាសភាគនៃគម្រោងការគ្រប់ គ្រងហិរញ្ញវត្ថុ(FM) និងការរៀបចំកញ្ចប់លទ្ធកម្មរួមទាំងផែនការដកសាច់ប្រាក់ និងផែនការលទ្ធកម្ម ទី៣ ការបញ្ចប់ការរៀបចំការងារអនុវត្តសម្រាប់ភ្នាក់ងារអនុវត្ត (Implementation Agencies) និងភ្នាក់ងារប្រតិបត្តិ។
ទី៤ ការបញ្ចប់ឯកសារក្របខ័ណ្ឌបរិស្ថាន និងសង្គម ៥) ការរៀបចំសម្រាប់ការចចារហិរញ្ញប្បទាន និងការកំណត់ពេលវេលាសម្រាប់ការបញ្ចប់ជំហាននៃការរៀបចំគម្រោង ដើម្បីបំពេញលក្ខខណ្ឌវាយតម្លៃ រួមទាំងការបញ្ចប់នៃសៀវភៅណែនាំប្រតិបត្តិការគម្រោង និងទី៦ ការពិនិត្យកិច្ចព្រមព្រៀងលើកាលបរិច្ឆេទបណ្តោះអាសន្ន សម្រាប់ការចចារគម្រោងផងដែរ។
លោកកឹម បូរីបានថ្លែងអំណរគុណយ៉ាងជ្រាលជ្រៅ ដល់ក្រុមការងារគម្រោងដែលបានសហការសម្របសម្រួល ជាមួយធនាគារពិភពលោក និងភាគីពាក់ព័ន្ធ ក្នុងការជំរុញការរៀបចំគម្រោងនាពេលកន្លងមក ជាពិសេស សហសេវិកធនាគារពិភពលោក ដែលតែងតែជួយជ្រោមជ្រែងក្រសួងសាធារណការ និងដឹកជញ្ជូន លើវិស័យគ្រប់គ្រងប្រព័ន្ធចម្រោះទឹកកខ្វក់ និងការគ្រប់គ្រងសំណល់រឹង និងបានថ្លែងអំណរគុណចំពោះក្រុមការងារគ្រប់ផ្នែកពាក់ព័ន្ធទាំងអស់ ដែលបានខិតខំប្រឹងប្រែង ប្រកបដោយការប្តេជ្ញាចិត្តខ្លាំងក្លាក្នុងការអនុវត្តកិច្ចការងាររបស់ខ្លួន ដោយការទទួលខុសត្រូវខ្ពស់ ធ្វើឱ្យលេចចេញនូវសមិទ្ធផល ជាផ្លែផ្កាល្អប្រសើរលើគម្រោងមួយនេះ៕
