ដោយ: គង់ លាងហួរ
ម៉ានីល: លំហូរវិនិយោគដែលបានចុះបញ្ជី ជាមួយក្រុមប្រឹក្សាវិនិយោគរបស់ប្រទេសហ្វីលីពីន (BOI) នៅក្នុងខែមករាឆ្នាំ២០២៣នេះ បានកើនឡើងដល់៧,៥៥ពាន់លានដុល្លារអាមេរិក។ នេះបើយោងតាមទិន្នន័យពីនាយកដ្ឋានពាណិជ្ជកម្ម និងឧស្សាហកម្មហ្វីលីពីន។
លោក Ceferino Rodolfo អនុរដ្ឋលេខាធិការពាណិជ្ជកម្មបានថ្លែងប្រាប់វេទិកាមួយកាលពីចុងសប្តាហ៍ថា លំហូរវិនិយោគនេះ ធ្វើឱ្យស្ថាប័នវិនិយោគរបស់រដ្ឋាភិបាល បានឈានដល់ជាង៤០ភាគរយ នៃគោលដៅចំនួន១ពាន់ពាន់លានប៉េសូ (ប្រហែល១៨,២ពាន់លានដុល្លារ) រួចទៅហើយសម្រាប់ឆ្នាំ២០២៣នេះ។
លោកបានបន្តថា ការវិនិយោគដែលបានចុះបញ្ជីដោយ BOI បានឈានដល់ជិត៦០ភាគរយ នៃកំណត់ត្រាក្នុងឆ្នាំ២០២២ រួចស្រេចទៅហើយ ដែលសំដៅ ទៅលើការវិនិយោគចំនួន៧២៩ពាន់លានប៉េសូ (ប្រហែល១៣,២៩ពាន់លានដុល្លារ) ដែលត្រូវបានអនុម័តដោយ BOI ក្នុងឆ្នាំ២០២២។
លោក Rodolfo បានបង្ហាញសុទិដ្ឋិនិយមថា “BOI អាចសម្រេចឈានដល់គោលដៅវិនិយោគ ដល់ចំនួន១ពាន់ពាន់លានប៉េសូរបស់ខ្លួន នៅឆ្នាំ២០២៣នេះ”។
លោក Rodolfo បានបញ្ជាក់ថា “ដំណើរទស្សនកិច្ចទៅក្រៅប្រទេសរបស់ប្រធានាធិបតីហ្វីលីពីន លោក Ferdinand Romualdez Marcos ក៏បានបង្កើតចំណាប់អារម្មណ៍ដ៏រ៉ឹងមាំ ពីសំណាក់ក្រុមវិនិយោគិនផងដែរ”។
ការកើនឡើងនៃការវិនិយោគនេះបានបង្ហាញថា ដំណើរទស្សនកិច្ចផ្សព្វផ្សាយរបស់រដ្ឋាភិបាល ហ្វីលីពីនកំពុងដំណើរការ ខណៈមានវិនិយោគិនមកពីបណ្តាប្រទេសអាស៊ីអាគ្នេយ៍ សហរដ្ឋអាមេរិក បែលហ្ស៊ិក និងចិនបង្ហាញចំណាប់អារម្មណ៍ ក្នុងការបណ្តាក់ទុននៅក្នុងប្រទេសហ្វីលីពីន៕
