ដោយ: គង់ លាងហួរ
ប៉េកាំង: គណៈកម្មការអភិវឌ្ឍន៍ និងកំណែទម្រង់ខេត្តបានឱ្យដឹងនៅថ្ងៃអាទិត្យនេះថា គម្រោងថាមពលស្អាតសរុបចំនួន១០ ក្រោមទុនវិនិយោគ ប្រហែល៨៨៣,៩លានដុល្លារអាមេរិក បានចាប់ផ្តើមការសាងសង់ហើយនៅក្នុងខេត្ត Liaoning ភាគឦសាននៃប្រទេសចិន។
គម្រោងថាមពលដើរដោយខ្យល់ និងថាមពលពន្លឺព្រះអាទិត្យនេះមានទីតាំងនៅទីក្រុង Shenyang ក្រុង Dalian ក្រុង Dandong ក្រុង Yingkou និងទីក្រុង Chaoyang ។
បន្ទាប់ពីគម្រោងទាំងនេះ ត្រូវបានដាក់ឱ្យដំណើរការ វាត្រូវបានគេប៉ាន់ប្រមាណថា ការផលិតអគ្គិសនី នៅលើបណ្តាញប្រចាំឆ្នាំ នឹងកើនឡើងដល់ជាង២,២ពាន់លានគីឡូវ៉ាត់ម៉ោង ដែលអាចបំពេញតម្រូវការអគ្គិសនីប្រចាំឆ្នាំរបស់ប្រជាជន២លានគ្រួសារ។
គម្រោងនេះ ក៏អាចសន្សំសំចៃធ្យូងថ្មស្តង់ដារ ចំនួន៦៧៥.៧០០តោន និងកាត់បន្ថយការបញ្ចេញឧស្ម័នផ្ទះកញ្ចក់ បានជាង២លានតោនជារៀងរាល់ឆ្នាំ។
គម្រោងនេះ គឺជាផ្នែកមួយនៃកិច្ចសហប្រតិបត្តិការ រវាងរដ្ឋបាលខេត្ត Liaoning និងក្រុមហ៊ុនផលិតអគ្គិសនី ដ៏ធំបំផុតមួយរបស់រដ្ឋចិន China Huaneng Group Co., Ltd.។
ក្រុមហ៊ុននេះគ្រោងនឹងប្រមូលផ្តុំទុន វិនិយោគលើសពី១០០ពាន់លានយ័ននៅខេត្ត Liaoning ក្នុងអំឡុងពេលផែនការ៥ឆ្នាំទី១៤(២០២១-២០២៥) ដែលត្រូវបានគេរំពឹងថា នឹងជំរុញលំហូរទុនវិនិយោគបែបឧស្សាហកម្មពាក់ព័ន្ធជាង៥០ពាន់លានយ័ន៕