ទីផ្សារអចលនទ្រព្យបែបពាណិជ្ជកម្មក្នុងក្រុងហុងកុងនឹងដាំក្បាលចុះបន្ថែមនៅឆមាសទី១ឆ្នាំនេះ

ដោយ: គង់ លាងហួរ

ហុងកុង: យោងតាមអ្នកវិភាគមួយរូប នៅក្រុមហ៊ុនហិរញ្ញវត្ថុអាមេរិក MSCI បានឱ្យដឹងថា ទីផ្សារវិនិយោគលើអចលនទ្រព្យ បែបពាណិជ្ជកម្មក្នុងទីក្រុងហុងកុង អាចរងផលប៉ះពាល់បន្ថែមទៀត នៅក្នុងឆមាសទី១ ឆ្នាំ២០២៣នេះ ខណៈវិនិយោគិនមួយចំនួន មានការខាតបង់យ៉ាងច្រើន ដោយសារថ្លៃដើមលើប្រាក់កម្ចីហក់ឡើងកាន់តែខ្ពស់។

នេះបើយោងតាមការចេញផ្សាយ ដោយសារពត៌មាន South China Morning Post នៅថ្ងៃទី១០ ខែកុម្ភៈនេះ។

លោក Benjamin Chow ប្រធានផ្នែកស្រាវជ្រាវទ្រព្យសកម្មអាស៊ីនៅក្រុមហ៊ុនទិន្នន័យហិរញ្ញវត្ថុ MSCI បានមានប្រសាសន៍ថា “ទំហំនៃការវិនិយោគអចលនទ្រព្យ នឹងធ្លាក់ចុះក្នុងរយៈពេលប៉ុន្មានខែខាងមុខនេះ”។លោក Chow បានបន្តថា “នៅដើមឆ្នាំមុន ផលប៉ះពាល់ពេញលេញនៃការដំឡើងអត្រាការប្រាក់ មិនទាន់សាយភាយនៅឡើយ ដូច្នេះវាទើបតែជះផលខ្លាំងនៅចុងឆ្នាំប៉ុណ្ណោះ”។

លោកបញ្ជាក់ថា “គោលនយោបាយរូបិយវត្ថុ និងគោលនយោបាយអត្រាប្តូរប្រាក់របស់ទីក្រុងហុងកុង ក្នុងន័យខ្លះ មានឥទ្ធិពលយ៉ាងខ្លាំងពីសហរដ្ឋអាមេរិក”។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

កាលពីដើមខែនេះ អាជ្ញាធររូបិយវត្ថុហុងកុង បានដំឡើងអត្រាការប្រាក់ចំនួន២៥ចំណុចមូលដ្ឋាន ដល់កម្រិតខ្ពស់៥ភាគរយ ស្របតាមធនា​គារកណ្តាលអាមេរិក ដើម្បីរក្សាកម្រិតរូបិយប័ណ្ណ ក្នុងស្រុកធៀបនឹងប្រាក់ដុល្លារអាមេរិក។

ការព្យាករណ៍ដ៏ទុទិដ្ឋិនិយមរបស់លោក Chow កើតឡើង បន្ទាប់ពីកិច្ចព្រមព្រៀងលក់នៅក្រុងហុងកុង និងទីផ្សារផ្សេងទៀតនៅក្នុងតំបន់បានឆ្លងកាត់ស្ថានភាពដ៏អាក្រក់នៅឆ្នាំ២០២២។

សម្រាប់ពេញមួយឆ្នាំ២០២២ សកម្មភាពបានដាំក្បាលចុះ៤១ភាគរយ មកត្រឹមតែ៦,៧ពាន់លានដុល្លារអាមេរិក។

ការជួញដូរការិយាល័យបានបន្តធ្លាក់ចុះ ពេញមួយឆ្នាំ២០២២ ដោយសារការកើនឡើង នៃអត្រាការប្រាក់បានធ្វើឱ្យអត្រាជួល សម្រាប់ការិយាល័យដាំក្បាលចុះ៕

LEAVE A REPLY

Please enter your comment!
Please enter your name here