ដោយ: គង់ លាងហួរ
ហុងកុង: ទំហំពាណិជ្ជកម្មរវាងសហរដ្ឋអាមេរិក និងចិនបានឈានដល់កម្រិតខ្ពស់បំផុតនៅឆ្នាំ២០២២ ទោះបីជាមានភាពតានតឹងផ្នែកនយោបាយរវាងមហាអំណាចទាំង២យ៉ាងណាក្តី។
ទំហំពាណិជ្ជកម្មទំនិញទ្វេរភាគី រវាងប្រទេសទាំងពីរបានកើនឡើងដល់៦៩០,៦ពាន់លានដុល្លារកាលពីឆ្នាំមុន។ នេះបើយោងតាមទិន្នន័យផ្លូវការរបស់សហរដ្ឋអាមេរិក ដែលបានចេញផ្សាយកាលពីថ្ងៃអង្គារ ម្សិលមិញនេះ។
ការនាំចេញរបស់អាមេរិកទៅកាន់ប្រទេសចិន បានកើនឡើងចំនួន២,៤ពាន់លានដុល្លារ ដល់១៥៣,៨ពាន់លានដុល្លារ ខណៈដែលការនាំចូលផលិតផលរបស់ចិន បានកើនឡើង៣១,៨ពាន់លានដុល្លារដល់៥៣៦,៨ពាន់លានដុល្លារ ។នេះបើយោងតាមការិយាល័យវិភាគសេដ្ឋកិច្ចអាមេរិក។
ក្រុមអ្នកវិភាគលើកឡើងថា “ទិន្នន័យនេះបង្ហាញថា គំនិតនៃការផ្តាច់ចំណង ឬកាត់បន្ថយការពឹងផ្អែកទៅវិញ ទៅមកនៅក្នុងផ្នែកជាច្រើន គឺបង្ហាញឱ្យឃើញកាន់តែច្រើន នៅក្នុងការពិភាក្សាគោលនយោបាយ នៅទីក្រុងវ៉ាស៊ីនតោន ជាជាងការពិតនៃពាណិជ្ជកម្ម”។
លោក Nick Marro អ្នកវិភាគនាំមុខគេ សម្រាប់ពាណិជ្ជកម្មសកលនៅអង្គភាពស៊ើបការណ៍សេដ្ឋកិច្ច បានប្រាប់សារពត៌មាន CNN ថា “ខ្សែសង្វាក់ផ្គត់ផ្គង់គឺមានភាពស្អិតរមួត ជាពិសេសខ្សែសង្វាក់ដែលភ្ជាប់ទៅនឹងប្រទេសចិន”។
រដ្ឋាភិបាលសហរដ្ឋអាមេរិក កំពុងធ្វើការដើម្បីកាត់បន្ថយការពឹងផ្អែកលើខ្សែសង្វាក់ផ្គត់ផ្គង់របស់ខ្លួនលើប្រទេសចិន ប៉ុន្តែនៅចុងបញ្ចប់ក្រុមហ៊ុនភាគច្រើនយកចិត្តទុកដាក់ ក្នុងការផ្តល់ផលិតផលរបស់ពួកគេ ដល់អ្នកប្រើប្រាស់ឱ្យទាន់ពេលវេលា និងតាមរបៀបដែលមានប្រសិទ្ធភាពបំផុត សម្រាប់ប្រតិបត្តិការរបស់ខ្លួន”៕
