ដោយ: គង់ លាងហួរ
ភ្នំពេញ: ប្រទេសហ្វីលីពីនបានបង្ហាញ ចំណាប់អារម្មណ៍យ៉ាងខ្លាំងចំពោះគុណភាពអង្ករកម្ពុជា ហើយភាគីទាំងពីរកំពុងចរចាលើតម្លៃ ដើម្បីសម្រេចបាននូវការធ្វើពាណិជ្ជកម្មផលិតផលអង្ករ។
ការសម្តែងចំណាប់អារម្មណ៍នេះ បានបង្ហាញចំពោះគណៈប្រតិភូ ដែលអញ្ជើញមកពីក្រសួងពាណិជ្ជកម្ម និងសហព័ន្ធស្រូវអង្ករកម្ពុជា (CRF) ក្នុងដំណើរបំពេញទស្សនកិច្ច នៅប្រទេសហ្វីលីពីន ចាប់ពីថ្ងៃទី១ ដល់ថ្ងៃទី៣ ខែកុម្ភៈ។
គណៈប្រតិភូកម្ពុជាដឹកនាំដោយ លោកស្រីគឹម ស្រីរ័ត្ន អនុរដ្ឋលេខា ធិការក្រសួងពាណិជ្ជកម្ម និងលោកឧកញ៉ា ចាន់ សុខឃាងប្រធានសហព័ន្ធស្រូវអង្ករកម្ពុជា(CRF)។
ក្រុមគណៈប្រតិភូកម្ពុជា បានធ្វើដំណើរទៅកាន់ប្រទេសហ្វីលីពីន ដើម្បីសិក្សាអំពីទីផ្សារអង្ករនៅក្នុងប្រទេសនេះ។
យោងតាមសេចក្តីប្រកាសព័ត៌មានរបស់ សហព័ន្ធស្រូវអង្ករកម្ពុជា (CRF) បញ្ជាក់ថា ក្នុងដំណើរទស្សនកិច្ចសិក្សាទីផ្សារ គណៈប្រតិភូកម្ពុជាបានជួបជាមួយលោក Alfredo E. Pascual លេខាធិការពាណិជ្ជកម្ម និងឧស្សាហកម្មហ្វីលីពីន និងអ្នកពាក់ព័ន្ធផ្សេងទៀតលើការនាំចូលអង្ករ។
ប្រទេសហ្វីលីពីន បានបង្ហាញនូវការចាប់អារម្មណ៍ យ៉ាងខ្លាំងលើគុណភាពអង្ករកម្ពុជា និងកិច្ចសន្យាពាណិជ្ជកម្មផ្ទាល់ ស្របតាមបរិមាណ គុណភាព និងតម្លៃដែលបានព្រមព្រៀងរវាងភាគីទាំងពីរ។
នៅក្នុងដំណើរទស្សនកិច្ចនេះ គណៈប្រតិភូកម្ពុជាក៏បានជួបពិភាក្សាជាមួយក្រុមហ៊ុននាំចូលអង្ករ ក្នុងប្រទេសហ្វីលីពីនផងដែរ៕
