ដោយ: គង់ លាងហួរ
ប៉េកាំង: ក្រោយថ្ងៃឈប់សម្រាកបុណ្យនិទាឃរដូវ រយៈពេល៧ថ្ងៃបានបញ្ចប់ គម្រោងហេដ្ឋារចនាសម្ព័ន្ធជាច្រើន នៅទូទាំងប្រទេសចិនបានចាប់ផ្តើមដំណើរការហើយ។
ក្រុមអ្នកជំនាញបានលើកឡើងថា គម្រោងវិនិយោគហេដ្ឋារចនាសម្ព័ន្ធដ៏ធំនឹងបន្តនៅឆ្នាំនេះ ដែលនឹងដើរតួនាទីឈានមុខគេ ក្នុងការជំរុញកំណើនសេដ្ឋកិច្ច។
ពិធីបើកការដ្ឋានសាងសង់មជ្ឈមណ្ឌល Yangpu Binjiang Smart Center ក្នុងទីក្រុងសៀងហៃ បានចាប់ផ្តើមកាលពីពេលថ្មីៗនេះ។
គម្រោងនេះជាចំណុចចាប់ផ្តើម នៃដំណាក់កាលថ្មីរបស់ផែនការសកម្មភាពរយៈពេល៣ឆ្នាំ និងជាគម្រោងដ៏ធំមួយ ក្នុងចំណោមគម្រោងទាំង១០០ ដែលរៀបចំដោយស្រុក Yangpu ក្នុងឆ្នាំ២០២៣នេះ។
នៅភាគខាងជើងនៃប្រទេសចិន ការសាងសង់ក៏បានចាប់ផ្តើមដំណើរការឡើងវិញយ៉ាងលឿនផងដែរ។
គម្រោងចំនួន៤៣ ដែលមានតម្លៃទុនវិនិយោគចំនួន៤១,៦ពាន់លានយ័ន បានចាប់ផ្តើមដំណើរការសាងសង់នៅក្នុងតំបន់ថ្មី Xiong’an ខេត្ត Hebei ដែលគ្របដណ្តប់លើហេដ្ឋារចនាសម្ព័ន្ធ សេវាសាធារណៈ និងទីក្រុងឆ្លាតវៃផងដែរ។
ក្រុមអ្នកជំនាញបានកត់សម្គាល់ថា “ការកសាងហេដ្ឋារចនាសម្ព័ន្ធផ្សេងៗ ត្រូវបានគេរំពឹងថា នឹងបន្តក្លាយជាកម្លាំងរុញច្រាន ដល់ការងើបឡើងវិញនៃសេដ្ឋកិច្ចចិន នៅឆ្នាំ២០២៣នេះ”៕