UN: សេដ្ឋកិច្ចពិភពលោកនឹងសម្រេចបានកំណើនត្រឹមជិត២ភាគរយនៅឆ្នាំ២០២៣នេះ

ដោយ: គង់ លាងហួរ
អន្តរជាតិ: យោងតាមរបាយការណ៍របស់អង្គការសហប្រជាជាតិ(UN) បានឱ្យដឹងថា កំណើនសេដ្ឋកិច្ចពិភពលោកត្រូវបានព្យាករណ៍ថា នឹងថយចុះពី៣ភាគរយក្នុងឆ្នាំ២០២២ ដល់១,៩ភាគរយ នៅក្នុងឆ្នាំ២០២៣ ដែលជាអត្រាកំណើនទាបបំផុតមួយ។

របាយការណ៍ស្តីពីស្ថានភាពសេដ្ឋកិច្ចពិភពលោក និងទស្សនវិស័យឆ្នាំ 2023 របស់អង្គការសហប្រជាជាតិបានព្យាករណ៍ថា កំណើនសេដ្ឋកិច្ចពិភពលោកនឹងកើនឡើងក្នុងកម្រិតមធ្យមដល់ទៅ២,៧ភាគរយ នៅឆ្នាំ២០២៤ ខណៈបញ្ហាម៉ាក្រូសេដ្ឋកិច្ចមួយចំនួនត្រូវបានគេរំពឹងថា នឹងចាប់ផ្តើមធ្លាក់ចុះនៅឆ្នាំក្រោយ។

របាយការណ៍បានបន្តថា ស្របពេលអតិផរណាហក់ឡើងខ្ពស់ ការរឹតបន្តឹងរូបិយវត្ថុដ៏ខ្លាំងក្លា និងការកើនឡើងនៃភាពមិនច្បាស់លាស់ បានធ្វើឱ្យល្បឿននៃការងើបឡើងវិញនៃសេដ្ឋកិច្ចពីវិបត្តិកូវីដមានការយឺតយ៉ាវ ដោយបានគំរាមកំហែងដល់ប្រទេសមួយចំនួន ទាំងប្រទេសអភិវឌ្ឍ និងកំពុងអភិវឌ្ឍ ជាមួយនឹងទស្សនវិស័យនៃការធ្លាក់ចុះសេដ្ឋកិច្ចនៅឆ្នាំ២០២៣នេះ។

សន្ទុះកំណើនសេដ្ឋកិច្ចបានធ្លាក់ចុះយ៉ាងខ្លាំងនៅក្នុងសហរដ្ឋអាមេរិក សហភាពអឺរ៉ុប និងបណ្តាប្រទេសអភិវឌ្ឍន៍ផ្សេងទៀត ក្នុងឆ្នាំ២០២២  ដែលជះឥទ្ធិពលយ៉ាងធ្ងន់ធ្ងរដល់សេដ្ឋកិច្ចពិភពលោក។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ផលិតផលក្នុងស្រុកសរុប (GDP) របស់អាមេរិក ត្រូវបានព្យាករណ៍ថា នឹងកើនឡើងត្រឹមតែ០,៤ភាគរយប៉ុណ្ណោះ ក្នុងឆ្នាំ២០២៣ បន្ទាប់ពីមានកំណើនប្រមាណ១,៨ភាគរយ ក្នុងឆ្នាំ២០២២។

ចំណែកឯ កំណើនសេដ្ឋកិច្ចនៅក្នុងប្រទេសចិនត្រូវបានព្យាករណ៍ថា នឹងមានភាពប្រសើរឡើង ក្នុងកម្រិតមធ្យម នៅឆ្នាំ២០២៣។

ខណៈរដ្ឋាភិបាលចិនបានកែសម្រួលគោលនយោបាយកូវីដសូន្យ និងបន្ធូរបន្ថយគោលនយោបាយរូបិយវត្ថុ និងសារពើពន្ធ កំណើនសេដ្ឋកិច្ចរបស់ប្រទេសចិន ត្រូវបានគេព្យាករណ៍ថា នឹងកើនឡើងដល់៤,៨ភាគរយនៅឆ្នាំ២០២៣។ នេះបើយោងតាមរបាយការណ៍របស់អង្គការសហប្រជាជាតិ៕

LEAVE A REPLY

Please enter your comment!
Please enter your name here