ដោយៈ គង់ សូរិយា
ភ្នំពេញៈ របាយការណ៍បានបង្ហាញថា វិស័យសំខាន់ៗចំនួន៧បានស្រូបយកទឹកប្រាក់ច្រើនជាងគេ ក្នុងផ្នែ្កកឥណទាន ដែលផ្តល់ជូនពីគ្រឹះស្ថានមីក្រូហិរញ្ញវត្ថុនានា។
យោងតាមរបាយការណ៍របស់ធនាគារជាតិនៃកម្ពុជា ដែលបានចេញផ្សាយកាលពីសប្តាហ៍មុនបានបង្ហាញថា វិស័យសំខាន់ៗ ដូចជា ពាណិជ្ជកម្ម លំនៅដ្ឋាន សំណង់ កសិកម្ម សណ្ឋាគារ ភោជនីយដ្ឋាន និងការផលិតជាដើម បានទទួលហិរញ្ញប្បទានច្រើនជាងគេ។
របាយការណ៍នេះបានបញ្ជាក់ថា ទ្រព្យសកម្មបច្ចុប្បន្ន នៅក្នុងប្រព័ន្ធធនាគាររបស់ប្រទេសកម្ពុជា បានកើនឡើងដល់៨០ពាន់លានដុល្លារអាមេរិក នៅឆ្នាំ២០២២ ពោលគឺកើនឡើង១៥,៩ភាគរយពីមួយឆ្នាំទៅមួយឆ្នាំ។
លោកជា ចាន់តូ ទេសាភិបាលធនាគារជាតិនៃកម្ពុជា បានមានប្រសាសន៍ថា“កំណើនប្រាក់កម្ចី និងប្រាក់បញ្ញើពិតជាឆ្លុះបញ្ចាំង ពីទំនុកចិត្តសាធារណៈ ចំពោះប្រព័ន្ធធនាគាររបស់ប្រទេសកម្ពុជាយើង”។
លោកបានមានប្រសាសន៍ថា ឧស្សាហកម្មធនាគារនៅតែរ៉ឹងមាំ និងមានភាពធន់ ហើយវាបានបន្តដើរតួនាទីយ៉ាងសកម្ម ក្នុងការគាំទ្រដល់ការងើបឡើងវិញនៃសេដ្ឋកិច្ចកម្ពុជាផងដែរ៕
