ដោយ: គង់ លាងហួរ
សេអ៊ូល: ទិន្នន័យធនាគារកណ្តាលកូរ៉េ បានបង្ហាញឱ្យដឹងថា ប្រាក់បញ្ញើរូបិយប័ណ្ណបរទេស របស់ប្រទេសកូរ៉េខាងត្បូង បានហក់ឡើងដល់កម្រិតខ្ពស់បំផុតកាលពីខែធ្នូ ឆ្នាំ២០២២ ខណៈក្រុមហ៊ុននានាបានដាក់មូលនិធិប្រាក់ដុល្លារអាមេរិកបន្ថែមទៀត នៅក្នុងគណនីធនាគារ។
ប្រាក់បញ្ញើជារូបិយប័ណ្ណបរទេស ស្ថិតក្នុងរង្វង់១១០,៩៨ពាន់លានដុល្លារអាមេរិក នៅចុងខែធ្នូ កើនឡើង៣,៥៩ពាន់លានដុល្លារ ធៀបនឹងខែវិច្ឆិកា។ នេះបើយោងតាមធនាគារកណ្តាលកូរ៉េ (BOK) ។
តួលេខនេះមានការកត់សម្គាល់ខ្ពស់បំផុត ចាប់តាំងពីទិន្នន័យ ដែលពាក់ព័ន្ធ ត្រូវបានចាប់ផ្តើមបានចងក្រង ក្នុងឆ្នាំ២០១២ ដោយរក្សាបាននូវនិន្នាការបំបែកកំណត់ត្រា សម្រាប់ខែទី២ជាប់ៗគ្នា។ ប្រាក់បញ្ញើជារូបិយប័ណ្ណបរទេស បានបន្តកើនឡើងរយៈពេល៤ខែជាប់ៗគ្នា។
ក្រុមហ៊ុនក្នុងស្រុកបានស្វែងរកការធានា នូវមូលនិធិដុល្លារបន្ថែមទៀត ស្របពេលមានការកើនឡើង នៃភាពមិនច្បាស់លាស់លើសេដ្ឋកិច្ចពិភពលោក។
ប្រាក់បញ្ញើគិតជាប្រាក់ដុល្លារអាមេរិក បានកើនឡើង១,៨៦ពាន់លានដុល្លារដល់៩៥,៣៨ពាន់លានដុល្លារ នៅចុងខែធ្នូ ហើយប្រាក់បញ្ញើជាប្រាក់យ៉េនជប៉ុន បានកើនឡើង០,៥៣ពាន់លានដុល្លារ ដល់ចំនួន៦,៦១ពាន់លានដុល្លារ។
ប្រាក់បញ្ញើជាប្រាក់អឺរ៉ូ បានកើនឡើង០,៩៩ពាន់លានដុល្លារ ដល់ចំនួន៥,៥ពាន់លានដុល្លារ ហើយប្រាក់បញ្ញើជាប្រាក់យ័នចិន បានកើនឡើងដល់១,៧៨ពាន់លានដុល្លារ។
ប្រាក់បញ្ញើជារូបិយប័ណ្ណបរទេស ដែលគ្រប់គ្រងដោយក្រុមហ៊ុននានាបានកើនឡើង៣,២៨ពាន់លានដុល្លារ ដល់៩៦,១ពាន់លានដុល្លារ ហើយប្រាក់បញ្ញើ ដែលគ្រប់គ្រងដោយបុគ្គល បានកើនឡើង០,៣១ពាន់លានដុល្លារដល់១៤,៨៨ពាន់លានដុល្លារ៕