ដោយៈ គង់ ម៉ាលីនណា
ភ្នំពេញៈ ធនាគារជាតិនៃកម្ពុជា(NBC) បានអះអាងថា រដ្ឋាភិបាលនឹងដាក់ដេញថ្លៃមូលបត្ររដ្ឋ លើកទី៦ នៅថ្ងៃទី២៥ ខែមករានេះ ដើម្បីប្រមូលមូលធន សម្រាប់អនុវត្តគម្រោងកសាង និងអភិវឌ្ឍន៍ជាតិ។
យោងតាមសេចក្តីប្រកាសព័ត៌មានរបស់ធនាគារជាតិ បានបញ្ជាក់ថា ការបោះផ្សាយមូលបត្ររដ្ឋលើកទី៦នេះ នឹងត្រូវដាក់ដេញថ្លៃនៅលើប្រព័ន្ធNBCPរបស់ធនាគារជាតិនៃកម្ពុជា ចាប់ពីម៉ោង៨ព្រឹកដល់ ២,៣០រសៀល ដោយបន្ថែមថា តម្លៃចារឹកក្នុងមួយឯកតាចំនួន១លានរៀល។
ធនគារជាតិនៃកម្ពុជាបានឱ្យដឹងថា អត្រាគូប៉ុង មានចំនួន៣,៤៨ភាគរយ ដោយទូទាត់គូប៉ុង ធ្វើឡើងក្នុងរយៈពេល៦ខែម្តង។
សេចក្តីប្រកាសដដែលបានឲ្យដឹងថា នៅឆ្នាំ២០២៣នេះ រាជរដ្ឋាភិបាល គ្រោងនឹងបោះផ្សាយលក់មូលបត្ររដ្ឋជាលើកទីពីរ ចំនួន២០០ដុល្លារអាមេរិក សម្រាប់សងប្រាក់ដើម នៃការបោះផ្សាយមូលប័ត្រឆ្នាំ២០២២ ចំនួន២០០ប៊ីលានរៀល សមមូលនឹងប្រមាណ៤៩ លានដុល្លារអាមេរិក និងការគ្រោងថវិកាចំនួន៦១៣ ប៊ីលានរៀល សមមូលនឹង១៥១លានដុល្លារអាមេរិកទៀត។
មូលធនឬប្រាក់ ទទួលបានពីការបោះផ្សាយនេះ គឺសម្រាប់ធ្វើហិរញ្ញប្បទានលើគម្រោងវិនិយោគ ដែលអាចផ្តល់ចំណូល ដោយត្រង់មករាជរដ្ឋាភិបាល និងផ្ដល់ផលរហ័ស ដើម្បីធានាប្រសិទ្ធភាពនៃការវិនិយោគ និងចីរភាពនៃការគ្រប់គ្រងបំណុល និងថវិកាជាតិ៕
