ដោយ៖ សហការី
ភ្នំពេញ៖ ធនាគារជាតិនៃកម្ពុជា បានបង្ហាញពីការកើនឡើងយ៉ាងឆាប់រហ័ស ក្នុងនោះពេញមួយឆ្នាំ២០២២ ការប្រើប្រាស់គណនីកាបូបអេឡិចត្រូនិក (E-wallet) ដែលកើនរហូតដល់១៧,៩លានគណី។
លោក ជា ចាន់តូ ទេសាភិបាលធនាគារជាតិនៃកម្ពុជា បានថ្លែងថា ចាប់តាំងពីវិបត្តិកូវីដ១៩មកការជួញដូរ តាមប្រព័ន្ធអនឡាញមាននិន្នាការកើនឡើងឆាប់រហ័ស ហើយមធ្យោបាយទូទាត់អេឡិចត្រូនិក កាន់តែពេញនិយមនៅទូទាំងប្រទេស ស្របពេលការប្រើប្រាស់ទូរស័ព្ទចល័តមាន១៩,៦លានគ្រឿង និងអ្នកប្រើប្រាស់អ៊ីនធឺណែតកើនដល់១៨លាននាក់។
លោកបានបញ្ជាក់ថា ការប្រើប្រាស់គណនីកាបូបអេឡិចត្រូនិក បានកើនគួរឡើងឱ្យកត់សម្គាល់ ដោយកើនឡើងដល់១៧,៩លានគណនី លើសពីនេះការតភ្ជាប់ប្រព័ន្ធទូទាត់ ជាមួយប្រទេសផ្សេងទៀតក្នុងតំបន់ ត្រូវបានជំរុញជាលំដាប់ សំដៅរួមចំណែកលើកកម្ពស់ពាណិជ្ជកម្ម ការវិនិយោគ ទេសចរណ៍ និងការបង្វែរប្រាក់ពីក្រៅប្រទេស។
លោកបានបន្ថែមថា កន្លងមកធនាគារជាតិនៃកម្ពុជា បានភ្ជាប់ប្រព័ន្ធទូទាត់ ជាមួយប្រទេសថៃ និងម៉ាឡេស៊ី និងកំពុងបញ្ចប់ការតភ្ជាប់ ជាមួយប្រទេសឡាវ និងវៀតណាម ដើម្បីដាក់ឱ្យដំណើរការនាពេលឆាប់ៗ៕