ដោយ៖ សុថារី
ភ្នំពេញ៖ កំណើនសេដ្ឋកិច្ចកម្ពុជាត្រូវបានរំពឹងថា នឹងមានសញ្ញាវិជ្ជមានឡើងវិញនៅក្នុងឆ្នាំ២០២៣ ដែលនឹងគាំទ្រដោយវិស័យសំខាន់ៗមួយចំនួន។ យ៉ាងណាក្តី ស្របពេលនេះក៏នៅមាន ទាំងកត្តាអំណោយផល និងហានិភ័យចំពោះកំណើនសេដ្ឋកិច្ចកម្ពុជានៅក្នុងឆ្នាំ២០២៣ផងដែរ។
យោងតាមលោកស្រី ជា សិរី ឧបការីទេសាភិបាល និងអគ្គនាយកបច្ចេកទេសនៃធនាគារជាតិបានឱ្យដឹងថា នៅក្នុងឆ្នាំ២០២៣ នេះ កត្តាអំណោយផលសម្រាប់សេដ្ឋកិច្ចកម្ពុជា រួមមាន ការកើនឡើងវិញនៃការវិនិយោគក្នុងតំបន់ និងការណ៍ ដែលកម្ពុជាមានទីតាំងភូមិសាស្ត្រនៅចំកណ្តាលអាស៊ាន ព្រមទាំង ការចូលជាធរមាននៃកិច្ចព្រមព្រៀង RCEP និងកិច្ចព្រមព្រៀងទ្វេភាគី បានជំរុញឱ្យមានការកើនឡើងការវិនិយោគក្នុងវិស័យកសិ-ឧស្សាហកម្ម។
លោកស្រីបានបន្តថា លើសពីនេះ លទ្ធភាពខ្ពស់នៃវិស័យធនាគារក្នុងការឆ្លើយតបនឹង តម្រូវការហិរញ្ញប្បទានក្នុងនិងក្រោយពេលមានវិបត្តិ និងសេដ្ឋកិច្ចមានភាពបើកទូលាយ និងសមាហរណកម្មខ្ពស់ បូកផ្សំនឹងស្ថិរភាពនយោបាយម៉ាក្រូសេដ្ឋកិច្ច និងហិរញ្ញវត្ថុ និងត្តាភាគលាភប្រជាសាស្ត្រ ក៏ចាត់ទុកថា ជាកត្តាអំណោយផលសម្រាប់កម្ពុជាផងដែរ។
យ៉ាងណាក្តីលោកស្រីក៏បានលើកឡើងពីហានិភ័យ និងបញ្ហាប្រឈម ដែលកម្ពុជាអាចនឹងត្រូវប្រឈមនៅក្នុងឆ្នាំ២០២៣ផងដែរ រួមមាន កំណើនទាបជាងការរំពឹងទុក នៃសេដ្ឋកិច្ចពិភពលោក និងតំបន់ ជាពិសេសប្រទេសអឺរ៉ុប និងចិន និងការកើនឡើងអតិផរណា ដែលនឹង ប៉ះពាល់ដល់ជីវភាពរបស់ប្រជាពលរដ្ឋទាំងមូល។
លោកស្រីបន្តថា លំហូរចេញនៃមូលធនពីប្រទេសកំពុងលូតលាស់ និងកំពុងអភិវឌ្ឍន៍ ដោយសារការរឹតត្បិតស្ថានភាព ទីផ្សារហិរញ្ញវត្ថុអន្តរជាតិ ការប្រែប្រួលអាកាសធាតុដែលអាចបន្ថយកំណើនក្នុង វិស័យកសិកម្ម ភាពមិនច្បាស់លាស់នៃការវិវត្តជំងឺកូវីដ-១៩ និងឧក្រិដ្ឋកម្មសាយប័រ ក៏ជាបញ្ហាប្រឈមសម្រាប់កំណើនសេដ្ឋកិច្ចកម្ពុជាផងដែរ៕
