ដោយ: គង់ លាងហួរ
ភ្នំពេញ: យោងតាមរបាយការណ៍ប្រចាំឆ្នាំ របស់ធនាគារជាតិនៃកម្ពុជា (NBC) ចេញផ្សាយនៅថ្ងៃសុក្រនេះបានឱ្យដឹងថា ឧស្សាហកម្មធនាគាររបស់កម្ពុជា បន្តទទួលបានកំណើនដ៏រ៉ឹងមាំទាំង ប្រាក់កម្ចី និងប្រាក់បញ្ញើ នៅក្នុងឆ្នាំ២០២២។
របាយការណ៍ដដែលបានបន្តថា ប្រាក់កម្ចីដែលមិនទាន់សងបានកើនឡើង២១,៧ភាគរយ ដល់៥៦ពាន់លានដុល្លារអាមេរិក កាលពីឆ្នាំ២០២២ ខណៈប្រាក់បញ្ញើរបស់អតិថិជន បានកើនឡើង១៥,៣ភាគរយ ដល់ទំហំ៤៥ពាន់លានដុល្លារ។
ប្រាក់កម្ចីទាំងនេះ ត្រូវបានផ្តល់ដល់វិស័យសំខាន់ៗ ដូចជា ពាណិជ្ជកម្ម លំនៅដ្ឋាន សំណង់ កសិកម្ម សណ្ឋាគារ ភោជនីយដ្ឋាន និងការផលិតជាដើម។
របាយការណ៍នេះបានបញ្ជាក់ថា ទ្រព្យសកម្មបច្ចុប្បន្ន នៅក្នុងប្រព័ន្ធធនាគាររបស់ប្រទេសកម្ពុជា បានកើនឡើងដល់៨០ពាន់លានដុល្លារអាមេរិក នៅឆ្នាំ២០២២ ពោលគឺកើនឡើង១៥,៩ភាគរយពីមួយឆ្នាំទៅមួយឆ្នាំ។
លោកជា ចាន់តូ ទេសាភិបាលធនាគារជាតិនៃកម្ពុជា បានមានប្រសាសន៍ថា“កំណើនប្រាក់កម្ចី និងប្រាក់បញ្ញើពិតជាឆ្លុះបញ្ចាំង ពីទំនុកចិត្តសាធារណៈ ចំពោះប្រព័ន្ធធនាគាររបស់ប្រទេសកម្ពុជាយើង”។
លោកបានមានប្រសាសន៍នៅថ្ងៃសុក្រនេះ ក្នុងអំឡុងពេលកិច្ចប្រជុំប្រចាំឆ្នាំរបស់ធនាគារជាតិថា “ឧស្សាហកម្មធនាគារនៅតែរ៉ឹងមាំ និងមានភាពធន់ ហើយវាបានបន្តដើរតួនាទីយ៉ាងសកម្ម ក្នុងការគាំទ្រដល់ការងើបឡើងវិញនៃសេដ្ឋកិច្ចកម្ពុជាផងដែរ”។
ទន្ទឹមនឹងនេះ លោក ជា ចាន់តូ បានបន្តថា ប្រទេសកម្ពុជាបានកត់ត្រាគណនី e-wallet ចំនួន១៧,៩លានគណនី គិតត្រឹមឆ្នាំ២០២២ ដែលលើសពីចំនួនប្រជាជនកម្ពុជាចំនួន១៦លាននាក់៕