ដោយ: គង់ លាងហួរ
ភ្នំពេញ: យោងតាមរបាយការណ៍របស់អគ្គនាយកដ្ឋានគយ និងរដ្ឋាករ ចេញផ្សាយនៅថ្ងៃអង្គារនេះ បានឱ្យដឹងថា ប្រទេសកម្ពុជាបាននាំចេញផលិតផលមានតម្លៃ២២,៤៨ពាន់លានដុល្លារអាមេរិក ក្នុងឆ្នាំ២០២២ ពោលគឺកើនឡើងប្រហែល១៦,៤ភាគរយ ពី១៩,៣ពាន់លានដុល្លារ កាលពីឆ្នាំ២០២១។
របាយការណ៍ដដែលបានបន្តថា ផលិតផល ដែលនាំចេញសំខាន់ៗរបស់កម្ពុជា រួមមានសម្លៀកបំពាក់ ស្បែកជើង ផលិតផលធ្វើដំណើរ កង់ និងទំនិញកសិកម្មមួយចំនួន ដូចជា អង្ករ កៅស៊ូ ដំឡូងមី ចេក និងស្វាយ។
ប្រទេសគោលដៅនាំចេញកំពូលទាំង៥ របស់កម្ពុជារួមមាន សហរដ្ឋអាមេរិក វៀតណាម ចិន ជប៉ុន និងកាណាដា។
ជាមួយគ្នានេះដែរ កម្ពុជាបានរាយការណ៍ពីទំហំនៃការនាំចូលសរុបចំនួន២៩,៩៤ពាន់លានដុល្លារ ក្នុងឆ្នាំ២០២២ កើនឡើងប្រហែល៤,៣ភាគរយ ពី២៨,៧ពាន់លានដុល្លារ កាលពីឆ្នាំ២០២១។ ទំនិញនាំចូលសំខាន់ៗរួមមាន ប្រេង និងឧស្ម័ន វត្ថុធាតុដើមសម្រាប់កាត់ដេរ ស្បែកជើង និងផលិតផលធ្វើដំណើរ យានជំនិះ គ្រឿងចក្រ គ្រឿងអេឡិចត្រូនិក និងផលិតផលប្រើប្រាស់ផ្សេងៗ។
អនុរដ្ឋលេខាធិការក្រសួងពាណិជ្ជកម្មកម្ពុជា លោក ប៉ែន សុវិជាតិ បានមានប្រសាសន៍ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បានបញ្ចូលកម្លាំងជំរុញដ៏សំខាន់ ដល់កំណើនពាណិជ្ជកម្មរបស់ប្រទេសកម្ពុជា។
លោកបានបញ្ជាក់ថា “ក្រុមហ៊ុន RCEP និង CCFTA គឺជាកាតាលីករសម្រាប់កំណើនពាណិជ្ជកម្មរយៈពេលវែង និងនិរន្តរភាពរបស់យើង ហើយកិច្ចព្រមព្រៀងពាណិជ្ជកម្មសេរីទាំងពីរ គឺជាមេដែកស្រូបទាញលំហូរវិនិយោគផ្ទាល់ ពីបរទេសកាន់តែច្រើន មកកាន់ប្រទេសរបស់យើង”។
លោកបានបន្ថែមថា“ខ្ញុំជឿថាកំណើនពាណិជ្ជកម្មរបស់យើង នឹងកើនឡើងខ្ពស់ ក្នុងឆ្នាំនេះ និងលើសពីនេះ”៕