ប្រទេស​ថៃ​ជាប់​ចំណាត់​ថ្នាក់​លេខ​១ក្នុង​អាស៊ានជាប្រទេសសម្រេច​គោលដៅ​និរន្តរភាព​របស់UN

ដោយ: គង់ លាងហួរ

បាងកក: ប្រទេសថៃបានជាប់ចំណាត់ថ្នាក់លេខ១ក្នុងអាស៊ាន សម្រាប់ការសម្រេចបាននូវគោលដៅអភិវឌ្ឍន៍ប្រកបដោយនិរន្តរភាព សម្រាប់រយៈពេល៤ឆ្នាំ ដែលកំពុងដំណើរការចាប់តាំងពីឆ្នាំ២០១៩ ដោយផ្អែកលើគោលដៅអភិវឌ្ឍន៍ប្រកបដោយចីរភាព (SDGs) របស់អង្គការសហប្រជាជាតិ។

យោងតាមរបាយការណ៍អភិវឌ្ឍន៍ប្រកបដោយនិរន្តរភាពឆ្នាំ២០២២ បានឱ្យដឹងថា ប្រទេសថៃបានឈ្នះ៧៤,១២ពិន្ទុ ហើយត្រូវបានជាប់ចំណាត់ថ្នាក់លេខ៤៤ នៅទូទាំងពិភពលោក។

អ្នក​នាំ​ពាក្យ​រង​រដ្ឋាភិបាល​ លោកស្រី Tipanan Sirichana បានមានប្រសាសន៍ថា គោលដៅអភិវឌ្ឍន៍ប្រកបដោយចីរភាព  (SDGs) របស់អង្គការសហប្រជាជាតិ គឺស្របតាមយុទ្ធសាស្ត្រជាតិរយៈពេល២០ឆ្នាំរបស់ប្រទេសថៃ ដែលមានគោលបំណងធ្វើឱ្យប្រទេសនេះក្លាយជាប្រទេសអភិវឌ្ឍន៍ ដែលមានសន្តិសុខ វិបុលភាព និងនិរន្តរភាព។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោកស្រីបានបន្តថា យោងតាមអង្គការសហប្រជាជាតិ “ការមិនទុកនរណាម្នាក់ចោល” គឺជាបេះដូងនៃ SDGs ហើយប្រទេសថៃបានផ្តោតការយកចិត្តទុកដាក់កាន់តែខ្លាំងលើ SDGs ចំនួន៥ រួមមាន គ្មានភាពក្រីក្រ ការអប់រំប្រកបដោយគុណភាព ទឹកស្អាតនិងអនាម័យ ឧស្សាហកម្ម ការច្នៃប្រឌិតនិងហេដ្ឋារចនាសម្ព័ន្ធ ព្រមទាំងការប្រើប្រាស់ និងផលិតកម្មប្រកបដោយការទទួលខុសត្រូវ។

លោកស្រីបានអះអាងថា រដ្ឋាភិបាលថៃបានសម្រេចជោគជ័យ ក្នុងការអភិវឌ្ឍន៍ហេដ្ឋារចនាសម្ព័ន្ធ ទាំងរូបវន្ត និងឌីជីថល ព្រមទាំងគោលដៅរបស់ខ្លួនលើគំរូសេដ្ឋកិច្ច Bio-Circular-Green Economy នៅក្នុងកិច្ចប្រជុំកំពូល Apec កាលពីខែវិច្ឆិកា ឆ្នាំ២០២២។

លោក​ស្រី​បាន​បន្ថែមថា ​“សមិទ្ធិ​ផល​ទាំង​នេះ​បានបង្ហាញ​ថា​ រដ្ឋាភិបាល​កំពុង​ដើរ​ក្នុង​ទិស​ដៅ​ត្រឹម​ត្រូវ​ដោយ​មាន​លក្ខណៈ​វិនិច្ឆ័យ​ និង​សូចនាករ​ ដែល​ត្រូវ​តាម​ស្តង់ដារ​អន្តរជាតិ”៕

 

LEAVE A REPLY

Please enter your comment!
Please enter your name here