ដោយ: គង់ លាងហួរ
អន្តរជាតិ: មន្ត្រីម៉ាឡេស៊ីមួយរូបបានមានប្រសាសន៍ កាលពីថ្ងៃអាទិត្យម្សិលមិញនេះថា ប្រទេសម៉ាឡេស៊ីគ្រោងជំរុញទំហំពាណិជ្ជកម្មទ្វេរភាគី ជាមួយប្រទេសជិតខាងឥណ្ឌូនេស៊ី រួមទាំងការវិនិយោគឆ្លងព្រំដែនក្នុងវិស័យសំខាន់ៗមួយចំនួន។
រដ្ឋមន្ត្រីពាណិជ្ជកម្ម និងឧស្សាហកម្មអន្តរជាតិ លោក Tengku Zafrul Tengku Abdul Aziz បានបញ្ជាក់នៅក្នុងសេចក្តីថ្លែងការណ៍មួយថា ក្នុងចំណោមវិស័យ ដែលយើងចាប់អារម្មណ៍ ដូចជា ឱសថ លំហអាកាស កែច្នៃប្រេងដូង ទំនិញប្រើប្រាស់ ការការពារ និងសន្តិសុខផងដែរ។
លោកបានបន្តថា វិស័យទាំងនេះត្រូវបានឆ្លុះបញ្ចាំងនៅក្នុងអនុស្សរណៈនៃការយោគយល់ (MOU) ចំនួន៩ រវាងក្រុមហ៊ុនម៉ាឡេស៊ី និងឥណ្ឌូនេស៊ី ដែលមានទំហំទុនវិនិយោគសរុបជាង១,៦ពាន់លានរីងហ្គីត(ប្រមាណ៣៦៣លានដុល្លារអាមេរិក)។
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បច្ចុប្បន្នកំពុងបំពេញទស្សនកិច្ចផ្លូវការ រយៈពេល២ថ្ងៃនៅប្រទេសឥណ្ឌូនេស៊ី ចាប់ពីថ្ងៃអាទិត្យរហូតដល់ថ្ងៃច័ន្ទនេះ ដែលជាដំណើរទស្សនកិច្ចលើកដំបូងរបស់លោកនៅបរទេស ចាប់តាំងពីចូលកាន់តំណែង កាលពីខែវិច្ឆិកា ឆ្នាំ២០២២ ជាមួយនឹងរបៀបវារៈពាណិជ្ជកម្មមានកម្រិតខ្ពស់។
ក្នុងសមាគមប្រជាជាតិអាស៊ីអាគ្នេយ៍ ប្រទេសឥណ្ឌូនេស៊ី គឺជាដៃគូពាណិជ្ជកម្មដ៏ធំទី២ និងជាប្រភពវិនិយោគផ្ទាល់ពីបរទេសធំលំដាប់ទី៣របស់ម៉ាឡេស៊ី។ ទំហំពាណិជ្ជកម្មសរុប រវាងប្រទេសទាំងពីរមានប្រហែល២៣ពាន់លានដុល្លារ ក្នុងឆ្នាំ២០២១ ពោលគឺកើនឡើង៤៥,៥ភាគរយ ពីមួយឆ្នាំទៅមួយឆ្នាំ ធៀបនឹងឆ្នាំ២០២០។ គិតចាប់ពីខែមករា ដល់ខែវិច្ឆិកា ឆ្នាំ២០២២ ទំហំពាណិជ្ជកម្មទ្វេរភាគីរវាងប្រទេសទាំងពីរ សម្រេចបានលើសពី២៧ពាន់លានដុល្លារ រួចទៅហើយ៕