ដោយ: គង់ លាងហួរ
អន្តរជាតិ: សេដ្ឋកិច្ចរបស់បណ្តាប្រទេសអាស៊ានសំខាន់ៗ នឹងស្ថិតក្នុងចំណោមប្រទេសមួយចំនួន នៅលើពិភពលោក ដែលបង្ហាញពីកំណើនគួរឱ្យកត់សម្គាល់នៅឆ្នាំ២០២៣នេះ។
នេះបើយោងតាមរបាយការណ៍ ដែលបានចេញផ្សាយនាពេលថ្មីៗនេះ ដោយធនាគារធំជាងគេមួយនៅតំបន់អាស៊ីអាគ្នេយ៍ United Overseas Bank (UOB) ដែលមានទីស្នាក់ការនៅសិង្ហបុរី។
របាយការណ៍ដដែលបានបន្តថា កត្តាជាមូលដ្ឋានជាច្រើនគាំទ្រ ដល់គន្លឹះសេដ្ឋកិច្ចអាស៊ាន ដើម្បីការពារប្រឆាំងនឹងបរិយាកាសមិនច្បាស់លាស់ខាងមុខ នៅឆ្នាំ២០២៣នេះ ដោយសារហានិភ័យកើតឡើង ចំពោះវិបត្តិសេដ្ឋកិច្ច នៅសហរដ្ឋអាមេរិក ចក្រភពអង់គ្លេស និងអឺរ៉ុប ការរឹតបន្តឹងលក្ខខណ្ឌហិរញ្ញវត្ថុ ភាពតានតឹងនៃទំនាក់ទំនងអាមេរិក-ចិន និងសង្គ្រាមរុស្ស៊ី-អ៊ុយក្រែន។
សេដ្ឋកិច្ចរបស់បណ្តាប្រទេសអាស៊ានសំខាន់ៗ រួមមាន ប្រទេសអភិវឌ្ឍន៍ខ្លាំងបំផុតចំនួន៦ ដូចជា ប្រទេសថៃ សិង្ហបុរី វៀតណាម ឥណ្ឌូនេស៊ី ម៉ាឡេស៊ី និងហ្វីលីពីន។
លោក Enrico Tanuwidjaja អ្នកដឹកនាំរបាយការណ៍ UOB និងជាអនុប្រធានជាន់ខ្ពស់សម្រាប់ការស្រាវជ្រាវទីផ្សារ និងសេដ្ឋកិច្ចសកល បានបញ្ជាក់ប្រាប់សារពត៌មាន The Nation Thailand ថា មូលដ្ឋានគ្រឹះចំនួន១០ នឹងជួយដល់បណ្តាប្រទេសអាស៊ានសំខាន់ៗទាំង៦ឱ្យទប់ទល់នឹងភាពចលាចលជាសកល និងទប់ទល់នឹងការប្រែប្រួលជាសកល។
លោក Enrico បានមានប្រសាសន៍ថា មូលដ្ឋានគ្រឹះទាំង១០នោះ រួមមាន សន្ទុះខ្លាំងពីការងើបឡើងវិញក្រោយជំងឺរាតត្បាត ទិន្នផលកើនឡើងលើសពីកម្រិតមុនជំងឺរាតត្បាត ពាណិជ្ជកម្មរ៉ឹងមាំ ការស្តារវិស័យទេសចរណ៍ឡើងវិញ អត្រាអតិផរណាទាប ការផ្លាស់ប្តូរខ្សែសង្វាក់ផ្គត់ផ្គង់ លំហូរវិនិយោគ ដែលមានសុខភាពល្អ ទុនបម្រុងបរទេសគ្រប់គ្រាន់សមត្ថភាពក្នុងការបង់ថ្លៃនាំចូល និងកម្រិតទាបនៃបំណុលរយៈពេលខ្លី៕
