ដោយៈម៉ាណេត
ភ្នំពេញៈ តម្រូវការប្រាក់រៀលពីសាខាធនាគារជាតិ នៃកម្ពុជាខេត្តកំពង់ធំមានចំនួន ៤៤០ពាន់ឬប៊ីលានរៀល (ប្រមាណ១០៧ លានដុល្លារអាមេរិក) ហើយសាខាក៏បានទទួលប្រាក់រៀលពីអតិថិជនចំនួន៥១១ ប៊ីលានរៀល (ប្រមាណ ១២៥ លានដុល្លារអាមេរិក) ធៀបនឹងការទទួលប្រាក់ដុល្លារអាមេរិក១៣២លានដុល្លារអាមេរិក ក្នុងរយៈពេល៩ខែ ដើមឆ្នាំ២០២០នេះ។ នេះបើយោងតាមការបាយការណ៍របស់ធនាគារជាតិនៃកម្ពុជា។
លោកជា ចាន់តូ ទេសាភិបាល ធនាគារជាតិនៃកម្ពុជា (NBC) ក្នុងពិធីសំណេះសំណាលជាមួយមន្ត្រី-បុគ្គលិកសាខាធនាគារជាតិ នៃកម្ពុជាខេត្តកំពង់ធំនៅថ្ងៃទី១៦ ខែតុលា ឆ្នាំ២០២០កន្លងមកបានថ្លែងថា ខេត្តកំពង់ធំជាខេត្តសក្តានុពលមួយក្នុងវិស័យកសិកម្ម ដែលមានប្រជាជនសរុបប្រមាណ៨០ម៉ឺននាក់ ក្នុងនោះ៨០%ជាកសិករ។ គ្រឹះស្ថានធនាគារ ដែលកំពុងប្រតិបត្តិការមានចំនួន១០ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើរ៦ និងគ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើរ៩ ។
លោកបាននថ្លែងបន្តថា ការផ្តត់ផ្គង់និងតម្រូវការសាច់ប្រាក់ សម្រាប់សម្រួលដល់សកម្មភាពសេដ្ឋកិច្ចក្នុងខេត្តបានកើនឡើង គួរឱ្យកត់សម្គាល់ក្នុងរយៈពេល២ទសវត្សរ៍ចុងក្រោយនេះ ជាពិសេសការប្រើប្រាស់ប្រាក់រៀល បានកើនឡើងយ៉ាងឆាប់រហ័ស ដល់ចំនួនប្រហាក់ប្រហែល នឹងការប្រើប្រាស់ប្រាក់ដុល្លារអាមេរិកដែរ។
ជាក់ស្តែងក្នុងរយៈពេល៩ខែនៃឆ្នាំ២០២០នេះ តម្រូវការប្រាក់រៀលពីសាខាធនាគារជាតិនៃកម្ពុជាខេត្តកំពង់ធំមានចំនួន៤៤០ ប៊ីលានរៀល (ប្រមាណ១០៧ លានដុល្លារអាមេរិក) ហើយសាខាក៏បានទទួលប្រាក់រៀល ពីអតិថិជនចំនួន៥១១ប៊ីលានរៀល (ប្រមាណ ១២៥ លានដុល្លារអាមេរិក) ធៀបនឹងការទទួលប្រាក់ដុល្លារអាមេរិក១៣២ លានដុល្លារអាមេរិក។
នៅក្នុងការអនុវត្តមុខងារភារកិច្ចរបស់ខ្លួន សាខាធនាគារជាតិនៃកម្ពុជាខេត្តកំពង់ធំ បានសម្រួលចរាចរណ៍សាច់ប្រាក់នៅក្នុងខេត្ត ដោយប្រសិទ្ធភាពបានចូលរួមក្នុងការលើកកម្ពស់ការប្រើប្រាស់ប្រាក់រៀល បានប្តូរក្រដាសប្រាក់រៀលចាស់ ទក់ រហែក ដោយឥតគិតថ្លៃ, បានឆ្លើយតបនឹងសំណួរនិងបណ្តឹងនានា របស់សាធារណជនលើការប្រើប្រាស់សេវាធនាគារ តាមដានស្ថានភាពសេដ្ឋកិច្ចនៅក្នុងតំបន់ និងចូលរួមក្នុងការកែទម្រង់ហិរញ្ញវត្ថុសាធារណៈរបស់រាជរដ្ឋាភិបាល៕
