ដោយៈ គង់ ម៉ាលីនណា
ភ្នំពេញៈ របាយការណ៍អគ្គនាយកដ្ឋានគយ និងរដ្ឋាករកម្ពុជា បង្ហាញថា ពាណិជ្ជកម្មរវាងកម្ពុជា និងថៃបានកើនដល់៤,២៩ ពាន់លានដុល្លារក្នុងរយៈពេល ១១ ខែដំបូងឆ្នាំ ២០២២ កើនជាង ១៨,៣ ភាគរយពីចំនួនជាង ៣,៦ ពាន់លានដុល្លារក្នុងរយៈពេល ដូចគ្នាកាលពីឆ្នាំមុន។
ក្នុងទំហំពាណិជ្ជកម្មរវាងប្រទេសទាំងពីរ ការនាំចេញពីកម្ពុជាសម្រេចបានជាង៧៥៦លានដុល្លារ កើនឡើងពី៥៥៨,៦លានដុល្លារ ស្មើនឹង ៣៥,៤ ភាគរយ ខណៈការនាំចូលបានកើនជិត៣,៥៤ ពាន់លានដុល្លារ ពីចំនួនជិត៣ពាន់លានដុល្លារ ស្មើ ១៥,២ ភាគរយ។
លោក សរ សារិន អនុប្រធានក្រុមប្រឹក្សាធុរកិច្ចកម្ពុជា (CBC) ដែលមានមូលដ្ឋាននៅទីក្រុងបាងកក បានឱ្យដឹងថា ទំនាក់ទំនងដ៏ជិតស្និទ្ធរវាងប្រទេសទាំង២ កំពុងដើរតួនាទីយ៉ាងសំខាន់ ក្នុងការជំរុញការផ្លាស់ប្តូរទំនិញប្រទេសជិតខាងទាំង២ បូករួមនឹងកំណើនតម្រូវការ ដោយសារការបន្ធូរបន្ថយការរឹតបន្តឹងជំងឺកូវីដ១៩ ដែលអនុញ្ញាតឱ្យភ្ញៀវ-ទេសចរអាចទៅទស្សនាប្រទេសមួយនេះបានកាន់តែងាយស្រួល។
លោកលើកឡើងថា ប្រទេសយើងទាំង២ មានទំនាក់ទំនងជិតស្និទ្ធទាក់ទងនឹងសេដ្ឋកិច្ច និងការទូត ដែលជាកត្តាសំខាន់ក្នុងការជំរុញការផ្លាស់ប្តូរពាណិជ្ជកម្ម។ ដូចយើងឃើញហើយថា បន្ទាប់ពីកូវីដ១៩ ធូរស្រាល លំហូរទេសចរបរទេស កំពុងត្រឡប់មកប្រទេសយើងទាំង២វិញ។ ដូច្នេះមានកំណើនតម្រូវការ ហើយសកម្មភាពអាជីវកម្មក៏ស្ទុះងើបឡើងវិញផងដែរ។
លោកសរ សារិនបានបន្តថា ចាប់តាំងពីការបង្កើត CBC រយៈពេលជាង២ឆ្នាំមក ស្ថាប័នលោកកំពុងដើរតួនាទីយ៉ាងសំខាន់ ក្នុងការផ្សព្វផ្សាយផលិតផល និងសក្តានុពលរបស់កម្ពុជាដល់ពាណិជ្ជករ និងវិនិយោគិនថៃ។
លោកបញ្ជាក់ថា យើងបានធ្វើការជាមួយសហគមន៍ ធុរកិច្ចថៃជាច្រើនក្នុងគោលបំណងផ្សព្វផ្សាយ ពីផលិតផលរបស់យើង ទៅកាន់ទីផ្សារថៃ ពីព្រោះយើងចង់ជំរុញការនាំចេញរបស់យើង ជាជាងការនាំចូល។
នាយករដ្ឋមន្ត្រីប្រទេសទាំង២ បានសម្តែងនូវការពេញចិត្ត ចំពោះការកើនឡើង នៃការផ្លាស់ប្តូរពាណិជ្ជកម្មទ្វេភាគី ទោះបីជាមានការប្រឈមដោយជំងឺកូវីដ១៩ និងកិច្ចសហប្រតិបត្តិការទ្វេភាគីផ្សេងទៀតក៏ដោយ៕
