ដោយ: គង់ លាងហួរ
ក្រុងគៀវ: ក្រុមមន្ត្រីបានមានប្រសាសន៍ថា ប្រទេសរុស្ស៊ីបានកំណត់គោលដៅវាយប្រហារ លើហេដ្ឋារចនាសម្ព័ន្ធដ៏សំខាន់របស់អ៊ុយក្រែន ដោយយន្តហោះគ្មានមនុស្សបើក នៅព្រឹកថ្ងៃចន្ទ ទី០២ ខែមករា លើទីក្រុងគៀវ និងតំបន់ជុំវិញនេះ។
ប្រទេសរុស្ស៊ីបានបន្តវាយលុកក្រុងគៀវជាយប់ទី២ជាប់ៗគ្នា បន្ទាប់ពីខ្លួនបានបាញ់មីស៊ីលពីគ្រប់ទិសរំលងរដ្ឋធានី នៅយប់ថ្ងៃចូលឆ្នាំសកល និងមុនថ្ងៃចូលឆ្នាំ។
លោក Oleksiy Kuleba រដ្ឋបាលក្រុងគៀវ បានឱ្យដឹងនៅលើកម្មវិធីផ្ញើសារ Telegram ថា ការវាយប្រហារដោយយន្តហោះគ្មានមនុស្សបើក នៅពេលយប់បានលាន់ឮយ៉ាងខ្លាំងនៅក្នុងរដ្ឋធានីគៀវ។ រុស្ស៊ីបានបាញ់បង្ហោះយន្តហោះដ្រូន Shahed ដែលផលិតដោយអ៊ីរ៉ង់ជាច្រើនលើក ដើម្បីកំណត់គោលដៅលើហេដ្ឋារចនាសម្ព័ន្ធសំខាន់ៗរបស់អ៊ុយក្រែន។
រដ្ឋបាលយោធារបស់ទីក្រុងគៀវ បានអះអាងថា គិតត្រឹមម៉ោង៣ទៀបភ្លឺម៉ោងក្នុងស្រុក ប្រព័ន្ធការពារដែនអាកាសរបស់អ៊ុយក្រែន បានបំផ្លាញយន្តហោះដ្រូនចំនួន១៦ ពីលើទីក្រុងគៀវ ខណៈសំឡេងស៊ីរ៉ែនវាយប្រហារតាមអាកាស បានបន្លឺឡើងនៅពេលនោះជាង៣ម៉ោង។
អភិបាលក្រុងគៀវ លោក Vitali Klitschko បានមានប្រសាសន៍ថា នៅព្រឹកព្រលឹមកំទេចកំទីពីយន្តហោះគ្មានមនុស្សបើក ដែលបំផ្លិចបំផ្លាញលើទីក្រុងគៀវ បានវាយប្រហារសង្កាត់ភាគឦសាន នៃរដ្ឋធានី ដោយបង្កឱ្យមនុស្សម្នាក់រងរបួស។
លោក Klitschko បានឱ្យដឹងនៅលើកម្មវិធីផ្ញើសារ Telegram ថា បុរសអាយុ១៩ឆ្នាំម្នាក់ ត្រូវបានគេបញ្ជូនទៅមន្ទីរពេទ្យនៅសង្កាត់ Desnianskiy នៃទីក្រុងគៀវ បន្ទាប់ពីមានកំទេចកំទីយន្តហោះគ្មានមនុស្សបើកបានបុកផ្លូវនៅទីនោះ និងធ្វើឱ្យខូចខាតអគារមួយ។
បញ្ជាការយោធាក្នុងតំបន់របស់អ៊ុយក្រែន នៅភាគខាងកើតរបស់ប្រទេសបានបញ្ជាក់ថា ប្រព័ន្ធការពារដែនអាកាសអ៊ុយក្រែន បានបំផ្លាញយន្តហោះគ្មានមនុស្សបើក Shahed ផលិតដោយអ៊ឺរ៉ង់ចំនួន៩គ្រឿង នៅលើតំបន់ Dnipropetrovsk និង Zaporizhzhia នៅព្រឹកព្រលឹមថ្ងៃច័ន្ទនេះ៕