ដោយ៖ សុផារី
ភ្នំពេញ៖ ក្រសួងពាណិជ្ជកម្ម គ្រោងរៀបចំគោលនយោបាយជាតិស្តីពី “ម្រេច” ដើម្បីបង្កើនប្រសិទ្ធិភាពនៃប្រកួតប្រជែងទីផ្សារអន្តរជាតិ និងបង្កើននូវតម្លៃបន្ថែមក្នុងខ្សែច្រវាក់ផលិតកម្មម្រេចកម្ពុជា។
លោក វ៉ា រុតសាន ប្រធានក្រុមទីប្រឹក្សានៃក្រសួងពាណិជ្ជកម្ម មានប្រសាសន៍ថា ក្រសួងពាណិជ្ជកម្ម នឹងជំរុញការរៀបចំគោលនយោបាយជាតិស្តីពី “ម្រេច” ក្នុងគោលដៅបង្កើនឧត្តមភាពប្រកួតប្រជែងរបស់កម្ពុជាឱ្យអស់លទ្ធភាព ។ ការបង្កើតគោលនយោបាយជាតិម្រេចនេះ គឺផ្តោតលើការអភិវឌ្ឍផ្ទៃដីដំាដុះម្រេចសរីរាង្គ ឬដាំម្រេចសុវត្ថិភាពខ្ពស់។
លោកមានប្រសាសន៍ថា ប្រទេសកម្ពុជាអាចអភិវឌ្ឍន៍ដីដាំម្រេចសរីរាង្គបាន។ នេះជាឧត្តមភាពរបស់កម្ពុជា ដែលអាចដកស្រង់យកចំណុចខ្លាំងមកប្រើប្រាស់ ដើម្បីអភិវឌ្ឍន៍វិស័យម្រេចរបស់កម្ពុជាឱ្យអស់លទ្ធភាព។
លោកបន្តថា សម្រាប់គោលនយោបាយជាតិម្រេចនេះ គឺមានលក្ខណៈមិនខុសគ្នាពីគោលនយោបាយជាតិស្តីពីស្វាយចន្ទី ប៉ុន្មានឡើយ។ គោលនយោបាយទាំងនេះ បង្កើតឡើងដើម្បីបង្កើនទិន្នផលដំណាំ កាត់បន្ថយថ្លៃដើម បង្កើនតម្លៃបន្ថែមក្នុងខ្សែច្រវាក់ផលិតកម្ម ជំរុញការវិនិយោគ និងជំរុញការនាំចេញជាដើម។
លោកបានលើកទឹកចិត្តដល់ភាគីពាក់ព័ន្ធទាំងអស់ ជាពិសេសវិស័យឯកជនត្រូវខិតខំរៀបចំ និងធ្វើយ៉ាងម៉េចឱ្យមានតម្លៃបន្ថែមក្នុងផលិតកម្ម និងដំណើរការចេញនាំម្រេចទៅកាន់ទីផ្សារពិភពលោកឱ្យកាន់តែប្រសើរ។
សម្រាប់គោលនយោបាយជាតិស្តីពីម្រេចដែលក្រសួងពាណិជ្ជកម្មរៀបចំឡើងនេះ សហព័ន្ធម្រេច និង គ្រឿងទេសកម្ពុជា បានត្រៀមខ្លួនជាស្រេច ក្នុងការចូលរួមផ្តល់ធាតុចូល និងជួយសម្របសម្រួលទីផ្សារក្នុងនិងក្រៅស្រុក។
លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានលើកឡើងថា នៅពេលភាគីពាក់ព័ន្ធទាំងអស់សហការគ្នា រួមមានទាំងផលិតករ ក្រុមហ៊ុនកែច្នៃនាំចេញ ក្រុមហ៊ុនផ្គត់ផ្គង់ផលិត-សេវាក្នុងវិស័យកសិកម្មឧស្សាហកម្ម រួមគ្នាអនុវត្តគោលនយោបាយជាតិស្តីពី “ម្រេច” នោះ វានឹងធ្វើឱ្យវិស័យម្រេចកម្ពុជាកាន់តែរីកចម្រើន ខណៈដែលកម្ពុជាកំពុងបើកទីផ្សារសេរីជាមួយប្រទេសក្នុងពិភពលោកជាបន្តបន្ទាន់។
ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា សម្រាប់រយៈពេល១១ខែ ឆ្នាំ២០២២ កម្ពុជានាំចេញបាន១៨.០០០តោន។ ក្នុងនោះ ទីផ្សារធំជាងគេរបស់កម្ពុជា គឺប្រទេសវៀតណាម ខណៈអាល្លឺម៉ង់ស្ថិតនៅលេខ២។ ម្រេចកម្ពុជាបានចូលដល់ទីផ្សារប្រទេសចំនួន១៧ ក្នុងពិភពលោក ដែលក្នុងនោះមានប្រទេសវៀតណាម សហរដ្ឋអាម៉េរិក កាណាដា សហភាពអឺរ៉ុប តៃវ៉ាន់ កូរ៉េខាងត្បូង ជប៉ុន អ៊ីស្រាអែល និងប្រទេសឥណ្ធា ជាដើម៕