ដោយ: លាងហួរ
ភ្នំពេញ: ទំហំពាណិជ្ជកម្មទ្វេរភាគីរវាងកម្ពុជា និងកូរ៉េខាងត្បូង សម្រេ ចបានទំហំទឹកប្រាក់៩៦២លានដុល្លារ ក្នុងរយៈពេល១១ខែដំបូង ដោយកើនឡើង១០,៦ភាគរយ។ នេះបើយោងតាមរបាយការណ៍ពីសមាគមពាណិជ្ជកម្មអន្តរជាតិកូរ៉េ (KITA)។
គិតចាប់ពីអំឡុងខែមករា ដល់ខែវិច្ឆិកា កម្ពុជាបាននាំចេញទំនិញ ទៅកូរ៉េខាងត្បូង ដែលមានតម្លៃ៣៧៣លានដុល្លារ ពោលគឺកើនឡើង២១ភាគរយធៀបនឹងរយៈពេលដូចគ្នាកាលពីឆ្នាំមុន។
កម្ពុជាបាននាំចូលផលិតផលពីប្រទេសកូរ៉េខាងត្បូង ដែលមានតម្លៃ៥៨៩លានដុល្លារ ដោយកើនឡើង៥ភាគរយ ធៀបនឹងឆ្នាំមុន។
ប្រទេសកម្ពុជាបាននាំចេញជាចម្បង នូវផលិតផលប្រើប្រាស់ដូចជាស្បែកជើង និងសម្លៀកបំពាក់ផ្សេងទៀត ផលិតផលធ្វើដំណើរ ភេសជ្ជៈ ធាតុផ្សំគ្រឿងអគ្គិសនី និងអេឡិចត្រូនិច កៅស៊ូ ឱសថ និងផលិតផលកសិកម្មទៅកាន់កូរ៉េខាងត្បូង។
កម្ពុជាបាននាំចូលយានយន្ត គ្រឿងអេឡិចត្រូនិច ឧបករណ៍ផ្ទះបាយ ភេសជ្ជៈ ឱសថ និងផលិតផលប្លាស្ទិក និងផលិតផលសម្រេច។
កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) បានចាប់ផ្តើមជំរុញទំហំពាណិជ្ជកម្មទ្វេរភាគី រវាងប្រទេសទាំង២ បន្ទាប់ពីកិច្ចព្រមព្រៀងនេះចូលជាធរមាននៅថ្ងៃទី០១ ខែធ្នូ ឆ្នាំ២០២២។
កិច្ចព្រមព្រៀង CKFTA ត្រូវបានគេរំពឹងថា នឹងជំរុញពាណិជ្ជកម្ម រវាងប្រទេសទាំងពីរ ដោយកូរ៉េខាងត្បូងយល់ព្រមដកពន្ធ លើផលិតផលចំនួន៩៥,៦ភាគរយ ដែលនាំចូលពីកម្ពុជា ខណៈកម្ពុជានឹងលុបចោលពន្ធលើទំនិញនាំចូលចំនួន៩៣,៨ភាគរយ។
ទាក់ទងនឹងលំហូរវិនិយោគផ្ទាល់ពីបរទេស ពីសាធារណៈរដ្ឋកូរ៉េ ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគកូរ៉េចំនួន២១៩ ដែលមានតម្លៃសរុប៥ពាន់លានដុល្លារ គិតត្រឹមខែកុម្ភៈ ឆ្នាំ២០២២ ដែលមួយផ្នែកធំជាគម្រោងសំណង់ និងអចលនទ្រព្យ។
លើសពីនេះទៅទៀត ច្បាប់វិនិយោគថ្មីរបស់កម្ពុជា ដែលចូលជាធរមានកាលពីដំណាច់ឆ្នាំ២០២១ ត្រូវបានគេរំពឹងថា នឹងជួយទាក់ទាញ លំហូរវិនិយោគកាន់តែច្រើន ពីប្រទេសកូរ៉េមកកម្ពុជា ជាពិសេសក្នុងវិស័យឌីជីថល និងផ្នែកកែច្នៃម្ហូបអាហារ៕