ដោយ: លាងហួរ
ភ្នំពេញ: កំពង់ផែស្វយ័តភ្នំពេញ(PPAP) បានព្យាករណ៍ថា អាជីវកម្មរបស់ខ្លួន អាចរកប្រាក់ចំណូលបានជិត៤០លានដុល្លារ នៅក្នុងឆ្នាំ២០២២ ខណៈអាជីវកម្ម និងសេវាកម្មភាគច្រើនបានកើនឡើងបើធៀបនឹងឆ្នាំមុន។
ចរាចរណ៍នៃកុងតឺន័រ ដែលជាប្រភពចំណូលចម្បងរបស់កំពង់ផែស្វយ័ត(PPAP) ដែលបានចុះបញ្ជីក្នុងផ្សារហ៊ុន ត្រូវបានគេរំពឹងថា នឹងកើនឡើង១៧,៥១ភាគរយ រហូតដល់៤១០.០០០TEUsនៅឆ្នាំនេះ កើនឡើងពី៣៤៨.៨៩៨TEUs ក្នុងឆ្នាំ២០២១ ទោះបីជាវាបានធ្លាក់ចុះបន្តិចក្នុងអំឡុងខែកញ្ញាដល់ខែវិច្ឆិកាយ៉ាងណាក្តី។
លោកហ៊ុន សុខាឡាយ នាយកផែនការទីផ្សារនៃ PPAP បានមានប្រសាសន៍កាលពីម្សិលមិញនេះថា ចរាចរណ៍កុងតឺន័រ បានកើនឡើងគួរឱ្យកត់សម្គាល់ក្នុងរយៈពេល៩ខែដំបូង បន្ទាប់ពីរដ្ឋាភិបាលបានបើកប្រទេសឡើងវិញ ដែលអនុញ្ញាតឱ្យPPAP អាចទទួលបានកុងតឺន័រកាន់តែច្រើន ដើម្បីបង្កើតប្រាក់ចំណូល។
លោកបានបន្តទៀតថា ការផ្ទុកប្រេងឥន្ធនៈ មិនមែនជាប្រភពចំណូលសំខាន់សម្រាប់PPAPនោះទេ ទោះបីជារបាយការណ៍បានបង្ហាញថាបរិមាណទំនិញ និងប្រេងឥន្ធនៈត្រូវបានរំពឹងថា នឹងកើនឡើង៨,៥៣ភាគរយរហូតដល់ជិត៤,២តោន ក្នុងឆ្នាំ២០២២ បើធៀបនឹងបរិមាណ៣,៨តោន នៅក្នុងឆ្នាំ២០២១។
លោកបញ្ជាក់ថា កំពង់ផែនេះគ្រាន់តែកត់ត្រា បរិមាណប្រេងសាំង ដែលនាំចូលមកប្រទេសកម្ពុជាប៉ុណ្ណោះ ខណៈដែលផលិតផលទាំងនេះត្រូវបានរក្សាទុកនៅកន្លែងរបស់ក្រុមហ៊ុននានា។
នៅក្នុងឆ្នាំនេះ ជាពិសេសនៅក្នុងឆមាសទីមួយ និងដើមឆមាសទីពីរ យើងបានទទួលការបញ្ជាទិញ កើនឡើងគួរឱ្យកត់សម្គាល់ ពីអតិថិជននៅក្រៅប្រទេស ប៉ុន្តែក្រោយមកដោយសារតែមានបញ្ហាសេដ្ឋកិច្ច ដូចជា អតិផរណា និងការកើនឡើងតម្លៃប្រេង រួមជាមួយនឹងផលប៉ះពាល់នៃសង្រ្គាមបានកាត់បន្ថយតម្រូវការបន្តិច។
ទោះជាយ៉ាងណាក៏ដោយ ក្រុមហ៊ុន PPAP ដែលចុះបញ្ជីនៅផ្សារមូលបត្រកម្ពុជា (CSX) កាលពីចុងឆ្នាំ២០១៥ ជាប្រតិបត្តិករកំពង់ផែទន្លេធំជាងគេ និងជាកំពង់ផែអន្តរជាតិមួយ ក្នុងប្រទេសកម្ពុជា នឹងគ្របដណ្តប់លើការចំណាយសរុបជាង ២២,៤៥លានដុល្លារ និងបង់ពន្ធប្រហែល៤លានដុល្លារ ដោយកំពង់ផែនេះអាចរកបានប្រាក់ចំណេញសុទ្ធ ប្រហែល១៣,២៥លានដុល្លារ សម្រាប់ឆ្នាំនេះ៕