ដោយៈ គង់ ម៉ាលីនណា
ភ្នំពេញៈ របាយការណ៍របស់អគ្គនាយកដ្ឋានគយ និងរដ្ឋាករកម្ពុជាបានបង្ហាញថា ទំហំពាណិជ្ជកម្មទ្វេភាគីរវាងកម្ពុជា- ជប៉ុន ក្នុងរយៈពេល ១១ ខែឆ្នាំ ២០២២ សម្រេចបានទឹកប្រាក់សរុបជិត១,៨ ពាន់លានដុល្លារ កើនជាង ១៣ ភាគរយបើធៀបនឹងរយៈពេលដូចគ្នាឆ្នាំមុន។
តារាងស្ថិតិជញ្ជីងពាណិជ្ជកម្មទំនិញ នៃអគ្គនាយកដ្ឋានគយ ឱ្យដឹងថា ការនាំចេញ-នាំចូលទំនិញរវាងកម្ពុជា និងជប៉ុន ក្នុងរយៈពេល១១ ខែឆ្នាំ ២០២២ មានទឹកប្រាក់សរុប១៧៨៩,៤៤ លានដុល្លារ កើន១៣,១ ភាគរយ បើធៀបនឹងរយៈពេលដូចគ្នាឆ្នាំមុន ដែលមានចំនួន១ ៥៨២,០៩ លានដុល្លារ។
ទឹកប្រាក់នៃការនាំចេញរបស់កម្ពុជា មានចំនួន១០៦៩,៣៧ លានដុល្លារ កើន៦,៨ភាគរយ និងនាំពីប្រទេសជប៉ុនមកកម្ពុជាមាន ៧២០,០៧ លានដុល្លារ កើន២៤ភាគរយ។
អនុប្រធានសភាពាណិជ្ជកម្មកម្ពុជា លោក លឹម ហេង និយាយថា ការធ្វើពាណិជ្ជកម្មរវាងកម្ពុជា និងជប៉ុន បានកើនឡើងជាលំដាប់ ដោយសាររ ដ្ឋាភិបាលប្រទេសទាំង២ មានទំនាក់ទំនងការទូតល្អជាមួយគ្នា ហើយចំនួនក្រុមហ៊ុនជប៉ុនវិនិយោគ នៅកម្ពុជាក៏មានកាន់តែច្រើនដែរ។
លោកបន្តថា “ជប៉ុនជាប្រទេសមានឧស្សាហកម្មរីកចម្រើន និងគុណភាពជីវិតរស់នៅមានកម្រិតខ្ពស់ ដូច្នេះកម្ពុជាមានឱកាសច្រើនក្នុងការនាំទំនិញទៅជប៉ុន ពិសេសផលិតផលកសិកម្ម”។
ផលិតផលសំខាន់ៗដែលកម្ពុជានាំទៅជប៉ុន មានដូចជា សម្លៀកបំពាក់ ស្បែកជើង គ្រឿងបង្គុំ និងកសិផល ចំណែកជប៉ុននាំចូលមកកម្ពុជាវិញមាន ផលិតផលគ្រឿងម៉ាស៊ីន រថយន្ត គ្រឿងអេឡិចត្រូនិក និងគ្រឿងចក្រសម្រាប់វិស័យកសិកម្មជាដើម។ នេះបើតាមលោក លឹម ហេង។
យោងតាមរបាយការណ៍របស់ធនាគារជាតិនៃកម្ពុជា បានបង្ហាញថា ជប៉ុន គឺជាប្រទេសដែលមានអ្នកមកវិនិយោគផ្ទាល់ នៅកម្ពុជាច្រើនជាងគេទី ៥ បន្ទាប់ពីប្រទេសចិន កូរ៉េខាងត្បូង សិង្ហបុរី និងវៀតណាម៕
