ដោយ: លាងហួរ
វ៉ាស៊ីនតោន: ប្រព័ន្ធផ្សព្វផ្សាយអាមេរិកបានរាយការណ៍ថា ប្រធានាធិបតីអ៊ុយក្រែន លោក Volodymyr Zelensky គ្រោងបំពេញទស្សនកិច្ចនៅទីក្រុងវ៉ាស៊ីនតោន នៅថ្ងៃពុធនេះ ដើម្បីចូលរួមកិច្ចប្រជុំ ដែលអាចធ្វើទៅបាន ជាមួយលោក ចូ បៃដិន និងសុន្ទរកថាទៅកាន់សភា។
យោងតាមរបាយការណ៍ដដែលបានឱ្យដឹងថា កិច្ចប្រជុំសេតវិមានអាចបង្ហាញពីសេចក្តីប្រកាសរបស់លោកចូ បៃដិន អំពីកញ្ចប់សព្វាវុធថ្មី សម្រាប់ទីក្រុងគៀវ រួមទាំងមីស៊ីលប្រភេទ Patriot ផងដែរ។
លោក Zelensky ដែលបានដឹកនាំប្រទេសសង្គ្រាម ដោយគ្មានការសម្រាករយៈពេល១០ខែ បានថ្លែងជាញឹកញាប់ទៅកាន់ក្រុមថ្នាក់ដឹកនាំ និងអ្នកគាំទ្រជុំវិញពិភពលោក ប៉ុន្តែគ្រាន់តែតាមទូរស័ព្ទ និងវីដេអូសន្និសីទប៉ុណ្ណោះ។
ដំណើរទស្សនកិច្ច ដែលបានគ្រោងទុករបស់លោក Zelensky ទទួលស្គាល់ថា សហរដ្ឋអាមេរិកគឺជាអ្នកគាំទ្រដ៏សំខាន់បំផុត នៃកិច្ចខិតខំប្រឹងប្រែងក្នុងសង្រ្គាម ដោយបានផ្តល់ជំនួយសរុបប្រមាណ៥០ពាន់លានដុល្លារ រួមទាំងជំនួយផ្នែកសន្តិសុខចំនួន២០ពាន់លានដុល្លារផងដែរ។
កាលពីថ្ងៃអង្គារកន្លងទៅ លោក Zelensky បានទៅសួរសុខទុក្ខកងទ័ពអ៊ុយក្រែន នៅទីក្រុង Bakhmut ដែលបច្ចុប្បន្ននេះជាចំណុចកណ្តាលនៃការប្រយុទ្ធគ្នា និងជាបន្ទាយជួរមុខផងដែរ។
ដំណើរទស្សនកិច្ចដោយមិនបានប្រកាសនោះបានកើតឡើង ខណៈវិមានក្រឹមឡាំងបានប្រកាសថា លោក វ្ល៉ាឌីមៀ ពូទីន នឹងជួបក្រុមមន្ត្រីយោធាជាន់ខ្ពស់ នៅថ្ងៃពុធ ដើម្បីវាយតម្លៃលើការវាយលុកទ្រង់ទ្រាយធំ មកលើអ៊ុយក្រែន រហូតមកដល់ពេលនេះ និងកំណត់គោលដៅ សម្រាប់ឆ្នាំក្រោយ បន្ទាប់រុស្ស៊ីបានបរាជ័យ ក្នុងសមរភូមិជាបន្តបន្ទាប់៕
