ដោយ: លាងហួរ
ក្រុងគៀវ: ប្រធានាធិបតីអ៊ុយក្រែនលោក Volodymyr Zelenskyy បានមានប្រសាសន៍ថា ការការពារព្រំដែនរបស់អ៊ុយក្រែន គឺជា“អាទិភាព”
ហើយអ៊ុយក្រែនបានត្រៀមខ្លួនរួចជាស្រេច សម្រាប់គ្រប់សេណារីយ៉ូ ដែលអាចកើតមានជាមួយរុស្ស៊ី និងសម្ព័ន្ធមិត្តបេឡារុស្សរបស់រុស្ស៊ី។
លោក Zelenskyy បានថ្លែងក្នុងសុន្ទរកថា ជាវីដេអូទៅកាន់ប្រជាជនអ៊ុយក្រែន និងអំពាវនាវទៅកាន់ប្រទេសលោកខាងលិច ដើម្បីស្នើសុំអាវុធការពារដែនអាកាសកាន់តែប្រសើរឡើង ដែលជាជំហានមួយដ៏មានឥទ្ធិពលបំផុតដើម្បីបញ្ឈប់ការឈ្លានពានរបស់រុស្ស៊ី។
នៅព្រឹកថ្ងៃចន្ទ ទី១៩ ខែធ្នូ ការព្រមានអំពីការវាយឆ្មក់តាមដែនអាកាសជាថ្មីម្តងទៀត បានផ្ទុះឡើងលើទីក្រុងគៀវ និងភាគខាងកើតនៃប្រទេសអ៊ុយក្រែន ដោយមានការបង្ហោះវីដេអូ នៃការបំផ្ទុះពាសពេញប្រព័ន្ធផ្សព្វផ្សាយសង្គម។
លោក Zelenskyy បានមានប្រសាសន៍បន្ទាប់ពីកិច្ចប្រជុំមួយនៃបញ្ជាការយោធាកំពូលរបស់អ៊ុយក្រែនថា “ការការពារព្រំដែនរបស់យើងជាមួយរុស្ស៊ី និងបេឡារុស្ស គឺជាអាទិភាព ហើយយើងកំពុងរៀបចំសម្រាប់សេណារីយ៉ូការពារទាំងអស់ដែលអាចកើតមាន”។
លោក Zelenskyy បានថ្លែងបែបនេះ នៅមុនថ្ងៃនៃដំណើរទស្សនកិច្ចទៅកាន់ប្រទេសបេឡារុស្ស របស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ស្របពេលមានការពិភាក្សា អំពីការវាយលុកថ្មីរបស់រុស្ស៊ី ដែលអាចអាចមានប្រភពមកពីប្រទេសបេឡារុស្ស។
ប្រទេសបេឡារុស្ស គឺជាសម្ព័ន្ធមិត្តដ៏ជិតស្និទ្ធបំផុតរបស់រុស្ស៊ី ហើយលោកប្រធានាធិបតី Alexander Lukashenko បានអនុញ្ញាតឱ្យទឹកដីនៃប្រទេសរបស់លោក ត្រូវបានប្រើប្រាស់ ដើម្បីចាប់ផ្តើមការឈ្លានពានរបស់រុស្សុីមកលើអ៊ុយក្រែននៅថ្ងៃទី២៤ ខែកុម្ភៈ។
ទោះបីជាយ៉ាងណាក្តី លោកបានអះអាងម្តងហើយម្តងទៀតថា លោកគ្មានចេតនា បញ្ជូនទាហានរបស់ប្រទេសបេឡារុស្ស ចូលក្នុងប្រទេសអ៊ុយក្រែននោះទេ៕