ដោយគង់ ម៉ាលីន
ភ្នំពេញៈ មានពលរដ្ឋកម្ពុជាប្រមាណតែ១៨ភាគរយប៉ុណ្ណោះ ដែលមានចំណេះដឹងផ្នែកហិរញ្ញវត្ថុ ចេះប្រើប្រាស់កម្ចីដើម្បីឲ្យមានភាពរីកចម្រើន ខណៈជាង៨០ភាគរយទៀត គ្មានចំណេះដឹងផ្នែក ហិរញ្ញវត្ថុ ដែលនេះជាមូលហេតុចម្បងដែលធ្វើឲ្យមានបំណុលវ័ណ្ដក។
លោកង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍ក្រុមហ៊ុនពិគ្រោះយោបល់ Emerging Markets Consulting បានមានប្រសាសន៍ថា ការប្រើប្រាស់កម្ចីរបស់មីក្រូហិរញ្ញវត្ថុ មានកំណើនខ្លាំងគួរឲ្យព្រួយបារម្ភ។ លោកបន្តថា ការស្រាវជ្រាវពីរដាច់ដោយឡែកពីគ្នាបានបង្ហាញថា ពលរដ្ឋខ្មែរតិចតួច ដែលមានចំណេះដឹងមូលដ្ឋានផ្នែកហិរញ្ញវត្ថុ។
យោងតាមការស្រាវជ្រាវរបស់ស្ថាប័ន Standard&Poor របស់សហរដ្ឋអាមេរិក បានបង្ហាញថា ពលរដ្ឋខ្មែរប្រមាណត្រឹម១៨ភាគរយប៉ុណ្ណោះ ដែលមានចំណេះដឹងមូល ដ្ឋានផ្នែកហិរញ្ញវត្ថុ ហើយនេះជាមូលហេតុនៃបំណុលវ័ណ្ដក។
យោងតាមរបាយការណ៍ សិក្សាបំណុលវ័ណ្ដករបស់ស្ថាប័នវិនិយោគ ក្នុងវិស័យមីក្រូហិរញ្ញវត្ថុ Blue Orchard, Incofin IM, Oikocredit នៅឆ្នាំ២០១៣ ចំនួនចន្លោះ៥១ភាគរយទៅ ៥៦ភាគរយ នៃអតិថិជនដែលជាកូនបំណុលបានបញ្ជាក់ថា មានការលំបាកក្នុងការសង ត្រឡប់មកម្ចាស់បំណុលវិញ។
របាយការណ៍ដដែលបានបញ្ជាក់ទៀតថា អតិថិជន២១ភាគរយ មានបំណុលច្រើនជាង១ស្ថាប័ន។ បើតាមរបាយការណ៍ខាងលើ ៦៦ភាគរយនៃអតិថិជន មិនបានខ្ចីប្រាក់យកទៅប្រកបរបរ ដើម្បីរកចំណូលនោះទេ៣៩ភាគរយ ខ្ចីប្រាក់ដើម្បីចំណាយលើអាហារ និង២៧ភាគរយ ខ្ចីប្រាក់ដើម្បីចំណាយលើសុខភាព៕