ដោយៈ គង់ ម៉ាលីនណា
ភ្នំពេញៈ មន្រ្តីជាន់ខ្ពស់នៃផ្សាតមូលបត្រកម្ពុជា បានបង្ហាញសុទិដ្ឋិនិយម ចំពោះកំនើនទឹកប្រាក់លើការជួញដូរនៅផ្សារហ៊ុនកម្ពុជា ខណៈវិស័យថ្មីនេះ ទទួលបានការចាប់អារម្មណ៍ពីសសាធារណៈជន។
អគ្គនាយកផ្សារមូលបត្រកម្ពុជា (CSX) លោក ហុង សុហួរបានមានប្រសាសន៍ឲ្យដឹងកាលពីដើមសប្តាហ៍នេះថា ជាមួយនឹងការកើននៃចំណាប់អារម្មណ៍របស់សាធារណជន លើការវិនិយោគក្នុងវិស័យមូលបត្រកម្ពុជា នឹងសម្រេចតាមគោលដៅ ដែលបានដាក់ឱ្យមានទំហំជួញដូរក្នុងទំហំទឹកប្រាក់១លានដុល្លារក្នុង១ថ្ងៃ នៅឆ្នាំក្រោយ និង១០០ លានដុល្លារនៅក្នុងរយៈពេល៧ឆ្នាំទៅមុខ។
លោកបានថ្លែងអំពីពិព៌ណផ្សារហ៊ុនកាលពីសប្តាហ៍មុនថា ក្នុងរយៈពេល៣ថ្ងៃ នៃពិព័រណ៍ផ្សារភាគហ៊ុនកម្ពុជា My First Stock ឆ្នាំ ២០២២ ដែលប្រារព្ធធ្វើកាលពីថ្ងៃទី ២១ ដល់ថ្ងៃទី២៣ ខែតុលា ឆ្នាំ ២០២២ នៅរាជធានីភ្នំពេញ មានវិនិយោគិនថ្មីជាង២ពាន់នាក់ បានស្នើបើកគណនីជួញដូរភាគហ៊ុន ដែលស្មើនឹងបរិមាណនៃការបើកគណនីរយៈពេល៧ខែ។
លោកបានបន្តថា “ជារួមយើងឃើញថា សាធារណជនមានការចាប់អារម្មណ៍ ពីទីផ្សាររបស់យើងច្រើនជាងការ ដែលយើងបានរៀបចំកន្លងៗមក”។ លោកបន្តថា “នេះជាក្តីសង្ឃឹមដ៏ធំសម្រាប់យើង។ យើងក៏បានសង្កេតឃើញមុនពេលចាប់ផ្តើម ដំណើរការកម្មវិធីយើងគឺការចាប់អារម្មណ៍ច្រើន ហើយសកម្មភាពជួញដូរក៏កើនឡើងដែរ”។
លោកបញ្ជាក់ថា ការកើនឡើងនេះ កាន់តែផ្តល់ក្តីសង្ឃឹមដល់យើងដែលបានកំណត់គោលដៅ ឱ្យបានទំហំជួញដូរ១លានដុល្លារក្នុង១ថ្ងៃនៅក្នុងឆ្នាំខាងមុខនេះ គឺយើងនឹងអាចសម្រេចបាន។
ជាមួយគ្នានេះ លោក ស៊ូ សុជាតិ អគ្គនាយកនិយតករមូលបត្រកម្ពុជាបានលើកឡើងក្នុងថ្ងៃបើកពិព័រណ៍ផ្សារហ៊ុនថា គិតត្រឹមត្រីមាសទី៣ ឆ្នាំ ២០២២ SERC បានផ្តល់លេខអត្តសញ្ញាណវិនិយោគិនចំនួន៣៣,១៨៦ ដែលក្នុងនោះវិនិយោគិន សញ្ជាតិខ្មែរមាន២៨,៦១៨នាក់ និងវិនិយោគិនបរទេសចំនួន៤៥៦៨នាក់។
លោកបន្តថា “ដើម្បីជំរុញទីផ្សារយើងឱ្យកាន់តែសកម្ម និងអាចប្រកួតប្រជែងជាមួយទីផ្សារផ្សេងទៀតនៅក្នុងតំបន់ ខ្ញុំសូមឱ្យក្រុមហ៊ុនមូលបត្រ និងក្រុមហ៊ុនបោះផ្សាយចូលរួមយ៉ាងសកម្ម ក្នុងការជំរុញការផ្សព្វផ្សាយអំពីផ្សារមូលបត្រកម្ពុជា”៕