ដោយ: លាងហួរ
មូស្គូ:យោងតាមមន្ត្រីជាន់ខ្ពស់មួយរូប បានឱ្យដឹងកាលពីថ្ងៃព្រហស្បតិ៍ម្សិលមិញនេះថា ប្រទេសរុស្ស៊ីអាចនាំចេញគ្រាប់ធញ្ញជាតិ ច្រើនជាង៥០លានតោន ក្នុងឆ្នាំ២០២២-២០២៣ ដែលកំណត់ដោយប្រធានាធិបតីរុស្ស៊ីលោកវ្លាឌីមៀ ពូទីន។ នេះបើយោងតាមការចេញផ្សាយដោយសារពត៌មានXinhua។
អនុរដ្ឋមន្ត្រីក្រសួងកសិកម្មទីមួយ លោកOksana Lut បានថ្លែងនៅក្នុងវេទិកាមួយថា ទិន្នផលនៅឆ្នាំនេះនឹងអាចឱ្យរុស្ស៊ី ផ្តល់គ្រាប់ធញ្ញជាតិទាំងក្នុងប្រទេស និងក្រៅប្រទេស ហើយរុស្ស៊ីមានឆន្ទៈ ក្នុងការផ្គត់ផ្គង់គ្រាប់ធញ្ញជាតិដល់ប្រទេសទាំងអស់ដែលត្រូវការ។
អ្នកនាំពាក្យក្រសួងការបរទេសរុស្ស៊ី លោកស្រីMaria Zakharova ក៏បានបញ្ជាក់កាលពីថ្ងៃព្រហស្បតិ៍ផងដែរ អំពីការត្រៀមខ្លួនរបស់ប្រទេសរុ ស្ស៊ី ក្នុងការផ្គត់ផ្គង់ទាំងគ្រាប់ធញ្ញជាតិ និងជី ដើម្បីធានាសន្តិសុខស្បៀងនៅក្នុងពិភពលោក។
លោកស្រីបានបន្តថា “ប្រទេសរុស្ស៊ីមានការលំបាកជាច្រើន ក្នុងការធ្វើដូច្នេះ ខណៈដែលសហរដ្ឋអាមេរិក បានព្យាយាមរារាំងឱកាសឱ្យបានច្រើន តាមដែលអាចធ្វើទៅបាន សម្រាប់ការទូទាត់ផ្នែកហិរញ្ញវត្ថុលើផលិតផលរបស់រុស្ស៊ី”។
លោកស្រីបានសង្កត់ធ្ងន់ថា សហរដ្ឋអាមេរិក បានបង្កការគំរាមកំហែងដល់សន្តិសុខស្បៀងជាសកល តាមរយៈការរារាំងយន្តការទូទាត់ប្រាក់របស់រុស្ស៊ី៕