ដោយៈ ម៉ាលីនណា
ភ្នំពេញៈ ទំហំពាណិជ្ជកម្មកម្ពុជា ជប៉ុនបានបង្ហាញសញ្ញាវិជ្ជមានជាមួយនឹងទំហំនៃការនាំចេញ-នាំចូលទំនិញរវាងកម្ពុជា-ជប៉ុននៅក្នុងរយៈ សម្រេចបានជិត១,៥ ពាន់លានដុល្លារ កើនជាង ១៥ ភាគរយបើធៀបនឹងរយៈពេលដូចគ្នាឆ្នាំមុន។
ទំហំពាណិជ្ជកម្មនេះ គិតត្រឹមដំណាច់ត្រីមាសទី៣ឆ្នាំនេះ ខណៈជញ្ជីងពាណិជ្ជកម្មកម្ពុជា មានឧត្តមភាពជិត៣០០លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
តារាងស្ថិតិជញ្ជីងពាណិជ្ជកម្មទំនិញ ជាមួយប្រទេសសំខាន់របស់អគ្គនាយកដ្ឋានគយ និងរដ្ឋាករកម្ពុជា បង្ហាញថា ចាប់ពីខែមករា ដល់ខែកញ្ញា ឆ្នាំ២០២២ ការធ្វើពាណិជ្ជកម្មកម្ពុជា-ជប៉ុន មានទំហំទឹកប្រាក់សរុប១ ៤៩៩,៥ លានដុល្លារ កើនឡើងចំនួន១៥,១ភាគរយ បើធៀបនឹងរយៈពេលដូចគ្នាឆ្នាំ ២០២១ មាន១៣០២,៦៧ លានដុល្លារ។
ទឹកប្រាក់ដែលកម្ពុជានាំទៅជប៉ុន ក្នុងពេល៩ ខែឆ្នាំ២០២២ គឺចំនួន ៨៩៧,៦៩ លានដុល្លារ កើនឡើង៨,៥ភាគរយពីចំនួន៨២៧,៤៩ លានដុល្លារ និងការនាំពីជប៉ុនមកកម្ពុជាមានទំហំទឹកប្រាក់៦០១,៨ លានដុល្លារ កើន ២៦,៦ ភាគរយ ពីចំនួន ៤៧៥,១៨ លានដុល្លារ។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ឱ្យដឹងថា វត្តមានរបស់ក្រុមហ៊ុនជប៉ុននៅកម្ពុជា បានកើនឡើងជាលំដាប់ ជាពិសេសក្នុងតំបន់សេដ្ឋកិច្ចពិសេស ដែលបាននិងកំពុងជួយឱ្យការនាំចេញទំនិញពីកម្ពុជា ទៅទីផ្សារជប៉ុនមានកាន់តែច្រើន។ លោកបន្តថា កំណើននៃការវិនិយោគរបស់ជប៉ុន គឺជាព័ត៌មានសំខាន់សម្រាប់វិនិយោគិនបរទេសមួយចំនួន ដែលតែងចាំមើលការបោះជំហានរបស់វិនិយោគិនជប៉ុន ព្រោះពួកគេយល់ថាប្រទេសណា ដែលវិនិយោគិនជប៉ុនទៅបណ្តាក់ទុនច្រើន គឺជាកន្លែងមានស្ថិរភាពនយោបាយ មានសុវត្ថិភាព មានច្បាប់វិនិយោគល្អ និងមានទីផ្សារនាំចេញរឹងមាំ។
លោកបន្ថែមថា “ក្រៅពីការបណ្តាក់ទុន ប្រទេសជប៉ុនក៏បានរួមចំណែកជួយជំរុញកំណើនសេដ្ឋកិច្ចកម្ពុជា តាមរយៈការសាងសង់ហេដ្ឋារចនាសម្ព័ន្ធផ្លូវថ្នល់ និងការបណ្តុះបណ្តាលធនធានមនុស្សផងដែរ”។ លោកបន្តថា “ក្រៅពីទំនាក់ទំនងទ្វេភាគីកម្ពុជា និងជប៉ុន ក៏ជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលជាកិច្ចព្រមព្រៀងពាណិជ្ជកម្មដ៏ធំនៅលើពិភពលោកផងដែរ”៕
