ដោយៈ គង់ ម៉ាលីនណា
ភ្នំពេញៈ តាមរយៈកិច្ចព្រមព្រៀងពាណិជ្ជកម្មសេរី ជាមួយប្រទេសចិន រដ្ឋាភិបាលកម្ពុជា គ្រោងនាំចេញសត្វមួយចំនួន ទៅកាន់ប្រទេសចិននាពេលខាងមុខនេះ។
សត្វចិញ្ចឹមដែលគ្រោងនាំចេញទៅកាន់ប្រទេសចិនរួមមាន ដូចជា គោ មាន់ ជ្រូក និងផលិតផលសត្វមួយចំនួនទៀតទៅប្រទេសចិន ដើម្បីកុំឱ្យមានការកកស្ទះនៅក្នុងស្រុក។
អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទកាលពីសប្តាហ៍មុន បានចេញលិខិតអំពាវនាវដល់អ្នកវិនិយោគក្នុងវិស័យចិញ្ចឹមសត្វ និងផលិតផលសត្វ ដែលមានបំណងនាំចេញសត្វ និងផលិតផលសត្វដូចជា ជ្រូករស់ គោរស់ សាច់ជ្រូក សាច់គោ សាច់មាន់ ស្បែកគោ ស្បែកជ្រូក និងផលិតផលផ្សេងទៀត អាចដាក់ពាក្យស្នើសុំមកអគ្គនាយកដ្ឋានសុខភាពសត្វ និងផលិតកម្មសត្វ ដោយបញ្ជាក់ពីប្រភេទសត្វ និងផលិតផលសត្វឱ្យបានច្បាស់លាស់ ទៅតាមប្រភេទនីមួយៗចាប់ពីថ្ងៃជូនដំណឹងនេះតទៅ ដើម្បីជំរុញការនាំចេញនៅពេលអនាគត។
សេចក្តីជូនដំណឹងនេះបានបញ្ជាក់ថា ការដាក់ពាក្យស្នើសុំនេះ ដើម្បី ឱ្យអគ្គនាយកដ្ឋានមានលទ្ធភាព រៀបចំបែបបទពាក់ព័ន្ធផ្សេងៗសុំការអនុញ្ញាតពីភាគីចិន ដើម្បីចុះមកត្រួតពិនិត្យ និងវាយតម្លៃហានិភ័យ និងឈានទៅរកការរៀបចំពិធីសារអនាម័យ និងកិច្ចព្រមព្រៀងក្នុងការនាំចេញ។
ប្រធានសមាគមអ្នកចិញ្ចឹមសត្វកម្ពុជា លោកស្រុន ពៅបានមានប្រសាសន៍ឲ្យដឹងនៅសប្តាហ៍នេះថា សមាគមមានការត្រេកអរយ៉ាងក្រៃលែង ដែលក្រសួងកសិកម្ម បានខិតខំជួយរកទីផ្សារ សម្រាប់នាំចេញទៅក្រៅប្រទេស ស្របពេលការផ្គត់ផ្គង់សាច់នៅកម្ពុជា មានលក្ខណៈគ្រប់គ្រាន់ ទាំងសាច់មាន់ និងសាច់ជ្រូក។
លោកថ្លែងថា “ការកកស្ទះសត្វចិញ្ចឹមនៅកម្ពុជា មានសម្ទុះកើនឡើង ដូច្នេះក្រសួងកសិកម្ម បានយកចិត្តទុកដាក់ខ្ពស់ ដើម្បីរកទីផ្សារជូនកសិករ”។លោកបន្តថា “ក្នុងអំឡុងពេលបុណ្យភ្ជុំការផ្គត់ផ្គង់សត្វ មិនមានការខ្វះខាតនោះទេ រហូតដល់លើសសល់មកដល់សព្វថ្ងៃនេះ។ ដូច្នេះបានក្រសួងរកទីផ្សារនាំចេញទៅក្រៅ នោះនឹងជួយផ្តល់ការងារដល់កសិករយើង”៕
