ដោយៈ វិវត្តន៍
ភ្នំពេញៈ ក្រុមហ៊ុនជប៉ុនមួយឈ្មោះ FIS Co.,Ltd មានបំណងនាំចូលផលិតផលកសិកម្មសក្តានុពលពីប្រទេសកម្ពុជា ដើម្បីធ្វើការចែកចាយលក់នៅទីផ្សារជប៉ុន ស្របពេលផលិតផលគ្រាប់ស្វាយចន្ទី កំពុងទទួលបានការពេញនិយមពីសំណាក់អតិថិជនក្នុងទីផ្សារដ៏ធំរបស់អាស៊ី។
ការបង្ហាញពីគម្រោងនាំចូលផលិតផលកសិកម្ម ពីប្រទេសកម្ពុជារបស់ក្រុមហ៊ុននេះ ត្រូវបានធ្វើឡើងនៅក្នុងជំនួបរវាងលោក ទុយ រី ឯកអគ្គរាជទូតកម្ពុជាប្រចាំនៅប្រទេសជប៉ុន ជាមួយនឹងលោក Miyamoto Hidemasa និងលោក Koshi Li តំណាងក្រុមហ៊ុន FIS Co., Ltd នៅស្ថានទូតកម្ពុជាកាលពីដើមខែកញ្ញា។
លោក ទុយ រី បានលើកឡើងអំពីផលិតផលសក្តានុពល នាំចេញរបស់កម្ពុជា ទៅកាន់ទីផ្សារអន្តរជាតិមាន ដូចជា សម្លៀកបំពាក់ ស្បែកជើង កាបូបធ្វើដំណើរ កង់ គ្រឿងបង្គុំអេឡិចត្រូនិក អង្ករ ដំឡូងមី ស្វាយចន្ទី ចេក ម្រេច ស្វាយ និងកសិផលដទៃទៀត ដែលជាទំនិញអាចមានទីផ្សារនៅជប៉ុន។ ក្រៅអំពីការនាំចេញ កម្ពុជាជាប្រទេសមានសេដ្ឋកិច្ចទីផ្សារបើកចំហមានទំនិញនាំចូលពីបរទេសច្រើនប្រភេទតាមតម្រូវការ។
លោកបានឲ្យដឹងថា “កម្ពុជាស្វាគមន៍ការវិនិយោគជប៉ុន បន្ថែមទៀត ការវិនិយោគរបស់ជប៉ុន នៅកម្ពុជាកំពុងមានកំណើនជាលំដាប់ ដែលមកដល់ពេលនេះគិតជាសរុបមាន១៤៩គម្រោង និងគិតជាប្រាក់ជិត៣០០០ លានដុល្លារអាមេរិក”។
តំណាងរបស់ក្រុមហ៊ុនFISទាំង២ ក៏បានរួមដំណើរចុះទៅពិនិត្យសាកសួរព័ត៌មានបន្ថែម នៅមជ្ឈមណ្ឌលពាណិជ្ជកម្មកម្ពុជា ក្នុងក្រុង Atsugi ដោយបានចាប់អារម្មណ៍លើSample ពីផលិតផលកម្ពុជាដែលមានសក្តានុពលមួយចំនួន។
នៅក្នុងដំណើរចុះទស្សនា មជ្ឈមណ្ឌលពាណិជ្ជកម្មកម្ពុជា ក្រុង Atsugi ក៏មានការចូលរួមស្វែងយល់ផងដែរ ពីសំណាក់ក្រុមហ៊ុនខ្មែររួមមាន Mony Trading Co.,Ltd (ខេត្ត អូសាកា) និង M7 Supermarket (ខេត្តហ្គឹម៉ា) ដែលកំពុងដំណើរការពាណិជ្ជកម្មនាំចេញនាំចូល និងបើកផ្សារម៉ាតលក់រាយនៅជប៉ុន ហើយពួកគេបានចាប់អារម្មណ៍ លើការសម្របសម្រួល និងលទ្ធភាពរបស់មជ្ឈមណ្ឌលពាណិជ្ជកម្មនៅ Atsugi ចំពោះការនាំចូលផលិតផលខ្មែរទៅចែកចាយនៅជប៉ុននាថ្ងៃខាងមុខ៕
