ដោយ៖ ម៉ាណេត
បាត់ដំបងៈ វិស័យអចលនទ្រព្យនៅខេត្តបាត់ដំបង ពិសេសនៅក្នុងក្រុងបាត់ដំបង ចាប់ផ្តើមបង្ហាញសក្តានុពលសម្រាប់វិនិយោគ ខណៈអ្នកវិនិយោគចាប់ផ្តើម ទៅវិនិយោគនៅទីក្រុងបាត់ដំបងបណ្តើរៗនាពេលបច្ចុប្បន្ននេះ។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងប្រាប់នៅល្ងាចទី១ ខែតុលា ឆ្នាំ២០២០កន្លងមកថា វិស័យអចលនទ្រព្យនៅក្នុងក្រុងបាត់ដំបង ចាប់ផ្តើមបង្ហាញសក្តានុពលសម្រាប់វិនិយោគ ហើយទីក្រុងនេះទទួលបានការវិនិយោគលើគម្រោងអចលនទ្រព្យជាបណ្តើរ។
លោកបានលើកឡើងថា“ខេត្តបាត់ដំបងជាមួយខេត្តមួយ ដែលភ្ជាប់ទំនាក់ទំនងជាមួយនឹងទីក្រុងភ្នំពេញ និងបណ្តាខេត្តផ្សេងៗដូចជា ខេត្តកោះកុង និងខេត្តសៀមរាប ហើយខេត្តជាខេត្ត ដែលសម្បូរដោយប្រជាជនមានជីវភាពធូរធា ដូច្នេះការប្រកបរបរមួយចំនួនក៏មានភាពធូរដែរ” ។
លោកបានថ្លែងថា វិស័យអចលនទ្រព្យនៅខេត្តបាត់ដំបង ចាប់ផ្តើមរីកចម្រើននៅក្នុងតំបន់នេះដែរ ជាពិសេសតំបន់នៅជាយក្រុងបាត់ដំបងតែម្តង ហើយអ្នកវិនិយោគិនមួយចំនួនចាប់ផ្តើមវិនិយោគនៅក្នុងខេត្ត។ លោកបន្តថា “ផ្ទះល្វែងនៅកៀកទីក្រុងបាត់ដំបងអាចតម្លៃចន្លោះពី៧ ទៅ៨ម៉ឺនដុល្លារ ហើយតម្លៃផ្ទះល្វែង ក្នុងក្រុងអាចមានតម្លៃជាង ១០ម៉ឺនដុល្លារ ហើយវានៅជាតម្លៃសមរម្យ។
លោកច្រឹក សុខនីម បានឱ្យដឹងទៀតថា “អ្នកវិនិយោគចាប់ផ្តើមទៅវិនិយោគនៅទីក្រុងបាត់ដំបងបណ្តើរៗនាពេលបច្ចុប្បន្ននេះ ប៉ុន្តែគ្រាន់ល្បឿននៃការវិនិយោគមិនទាន់លឿន ហើយវិនិយោគិនភាគច្រើនជាអ្នកមកក្នុងស្រុក” ។
អភិបាលខេត្តបាត់ដំបងលោកងួន រតនៈបានឱ្យដឹងកន្លងមកនេះថា ខេត្តបាត់ដំបងកាលពីកន្លងមកនេះ បានទាក់ទាញចំពោះការធ្វើអាជីវកម្ម និងអភិវឌ្ឍន៍នៅក្នុងវិស័យអចលនទ្រព្យ ប៉ុន្តែមានគម្រោងមួយចំនួនបានអនុវត្តន៍ បំពានលើច្បាប់ដែនដី ដូចជា ការចាក់ដីលុបស្ទឹង លុបប្រឡាយរបស់រដ្ឋជាដើម ដើម្បីទទួលបានផលប្រយោជន៍ខ្ពស់ ដែលសកម្មភាពនេះត្រូវតែជៀសវាងជាដាច់ខាត។
លោកបញ្ជាក់ថា “អ្នកធ្វើអាជីវកម្មវិស័យអចលនទ្រព្យ មុននឹងចង់វិនិយោគលើអាជីវកម្មរបស់ខ្លួន ត្រូវសិក្សាស្វែងយល់ពីតំបន់នីមួយៗ ឱ្យបានច្បាស់លាស់ មុននឹងដាក់ទុនវិនិយោគ ជៀសវាងមានផលប៉ះពាល់” ។
លោកបានបន្តថា អាជ្ញាធរខេត្តនឹងផ្ដល់លទ្ធភាព លើកទឹកចិត្ត ឱ្យមានការវិនិយោគផ្នែកអចលនាទ្រព្យក្នុងខេត្ត តាមរយៈការផ្ដល់ឯកសាររដ្ឋបាល ដោយមានគណនេយ្យភាព តម្លាភាព លឿនរហ័ស ប៉ុន្តែខាងម្ចាស់អាជីវកម្ម ក៏ត្រូវសិក្សាពីប្រព័ន្ធលូ បណ្ដាញអគ្គិសនី ទឹក និងផ្លូវជាដើម ដោយអនុវត្តឱ្យត្រឹមត្រូវតាមកិច្ចសន្យា និងផ្នែកច្បាប់៕
