ដោយៈសុធា
ភ្នំពេញៈ យុទ្ធសាស្ត្រអាជីវកម្ម គឺជាផ្នែកមួយសម្រាប់ជាជំនួយ ដល់ម្ចាស់អាជីវកម្មក្នុងការធ្វើសកម្មភាព និងការសម្រេចចិត្ត ដើម្បីឈានទៅដល់គោលដៅ ដែលបានកំណត់។ ការរៀបចំយុទ្ធសាស្ត្រអាជីវកម្ម ជាការកសាងផ្លូវទៅកាន់អនាគតសម្រាប់ក្រុមហ៊ុន ឬអាជីវកម្ម។
មូលហេតុចំបងមួយចំនួន ដែលយុទ្ធសាស្ត្រអាជីវកម្ម ពិតជាមានសារសំខាន់ខ្លាំងណាស់សម្រាប់អាជីវកម្មរបស់ក្រុមហ៊ុនមានដូចជា
- ការរៀបចំផែនការ
យុទ្ធសាស្ត្រអាជីវកម្មនឹងជួយ ដើម្បីកំណត់សកម្មភាពជាជំហានៗ ដែលម្ចាស់អាជីវកម្មត្រូវធ្វើ ដើម្បីទៅដល់នៅគោលដៅអាជីវកម្ម។
- ចំណុចខ្លាំង និងចំណុចខ្សោយ
ក្នុងដំណើរនៃការបង្កើតយុទ្ធសាស្ត្រអាជីវកម្ម នឹងធ្វើឱ្យម្ចាស់អាជីវកម្មស្គាល់កាន់តែច្បាស់បន្ថែមទៀត អំពីចំណុចខ្លាំងដែលជាចំណុច ដែលអ្នកនឹងឈ្នះ និងចំណុចខ្សោយដែលជាកន្លែងដែលអ្នកត្រូវពង្រឹងបន្ថែម។
- ប្រសិទ្ធភាពការងារ
សំដៅដល់ការបែងចែក និងប្រើប្រាស់ធនធានឱ្យប្រសិទ្ធភាព ហើយទទួលបានផលច្រើនបំផុត។
- ការត្រួតពិនិត្យ
ក្នុងដំណើរការនៃយុទ្ធសាស្ត្រអាជីវកម្ម ម្ចាស់អាជីវកម្មនឹងងាយស្រួលក្នុងការគ្រប់គ្រង និងត្រួតពិនិត្យនូវសកម្មភាពដែលគួរធ្វើ ឬមិនគួរធ្វើ ក៏ដូចជា សកម្មភាពនានាដែលផ្តល់លទ្ធផលល្អ សម្រាប់ការឈានទៅរកគោលដៅ។
- ឧត្តមភាពប្រកួតប្រជែង
ជាមួយនឹងការបង្កើតយុទ្ធសាស្ត្រអាជីវកម្ម ដែលនាំម្ចាស់អាជីវកម្មទៅកាន់គោលដៅអាជីវកម្ម វាក៏ផ្តល់ឱ្យអាចផ្តោតលើចំណុចខ្លាំង ដើម្បីបង្កើតទៅជាឧត្តមភាពប្រកួតប្រជែងដែលជាចំណុចធ្វើឱ្យខុសប្លែកពីគេ៕
