ដោយៈគង់ ម៉ាលីនណា
ភ្នំពេញៈ រដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិបានថ្លែងថា រាជរដ្ឋាភិបាលកម្ពុជាបាន និងកំពុងធ្វើការសម្រួលលើការធ្វើឲ្យប្រសើរឡើង នូវបរិយាកាសធុរកិច្ចនៅកម្ពុជា។
លោកបានថ្លែងបន្តថា រដ្ឋាភិបាលកម្ពុជាបានអនុវត្តន៍ ក្នុងប្រទេសនូវការកែទម្រង់មួយចំនួន ដើម្បីលើកកម្ពស់ និងជួយសម្រួលពាណិជ្ជកម្ម ការវិនិយោគ និងអាជីវកម្ម ដូចជា ការចុះបញ្ជីអាជីវកម្មអនឡាញប្រព័ន្ធទូទាត់ពន្ធអនឡាញ ប្រព័ន្ធបំពេញកម្មសិទ្ធិបញ្ញា ប្រព័ន្ធឌីជីថល សម្រាប់ការចេញវិញ្ញាបនបត្របញ្ជាក់ប្រភពដើមទំនិញ ការចុះបញ្ជីគម្រោងវិនិយោគដែលមានលក្ខណសម្បត្តិគ្រប់គ្រាន់ និងតារាងទិន្នន័យរបស់ក្រុមហ៊ុនផ្គត់ផ្គង់សម្រាប់ទំហំប្រកបដោយចីរភាព។
ទាក់ទងនឹងកិច្ចព្រមព្រៀងពាណិជ្ជកម្មសេរីរវាងអាស៊ាន និងចិន លោកប៉ាន សូរស័ក្តិបានមានប្រសាសន៍ថា សម្រាប់ប្រទេសកម្ពុជា ក្នុងនាមសមាជិករបស់កិច្ចព្រមព្រៀង FTA រវាងអាស៊ាន និងចិន យើងតែងតែប្ដេជ្ញាចិត្តក្នុងការអនុវត្តកិច្ចព្រមព្រៀងនេះ ដើម្បីទទួលបានអត្ថប្រយោជន៍អតិបរមា»។
លោកបានបញ្ជាក់ឲ្យដឹងផងដែរថា ដោយឡែកក្នុងវិស័យហិរញ្ញវត្ថុ ធនាគារជាតិនៃកម្ពុជា និងធនាគារកណ្ដាលចិន បានយល់ព្រមលើការធ្វើពាណិជ្ជកម្មរូបិយប័ណ្ណប្រាក់រៀល នៅលើទីផ្សារអន្តរធនាគារនៃខេត្ត Guangxi Zhou និងរូបិយប័ណ្ណទាំង២ ប្រាក់រៀល និងប្រាក់យន់ ត្រូវបានអនុញ្ញាតក្នុងការប្រើប្រាស់សម្រាប់ការធ្វើពាណិជ្ជកម្ម និងការវិនិយោគរវាងប្រទេសកម្ពុជា និងចិនតាំងពីឆ្នាំ ២០១៧។
លោករដ្ឋមន្ដ្រីកត់សម្គាល់ថា ក្នុងរយៈពេល៣០ឆ្នាំកន្លងមក ទំនាក់ទំនងពាណិជ្ជកម្ម និងកិច្ចសហប្រតិបត្តិការសេដ្ឋកិច្ចរវាងអាស៊ាន និងចិនបានបន្តរីកចម្រើនជាលំដាប់ ដោយទំហំពាណិជ្ជកម្មសរុបរវាងអាស៊ាន និងចិនសម្រេចបានក្នុងទឹកប្រាក់៥០៧,៩ ពាន់លានដុល្លារកាលពីឆ្នាំ២០១៩ និងលំហូរការវិនិយោគផ្ទាល់បរទេស (FDI) ពីប្រទេសចិនមកតំបន់អាស៊ានមាន៨,៩៧ ពាន់លានដុល្លារ៕
