ដោយៈ លក្ខិណា
ភ្នំពេញៈ ការនាំចេញរបស់កម្ពុជានៅដើមឆ្នាំ២០២១នេះ បានងើបឡើងវិញ ដែលជាចលករជំរុញឱ្យសេដ្ឋកិច្ចរបស់កម្ពុជានឹងមានកំណើនឡើងវិញ បន្ទាប់ពីបានធ្លាក់ចុះកាលពីឆ្នាំមុននេះ។ នេះបើយោងតាមរបាយការណ៍របស់ធនាគារពិភពលោកប្រចាំកម្ពុជានៅថ្ងៃទី១៧ ខែមិថុនា ២០២១នេះ។
ក្នុងរបាយការណ៍របស់ធនាគារពិភពលោកបានឱ្យដឹងថា ការនាំចេញទំនិញ ក្រៅពីការនាំចេញមាស បានកើនឡើង១២,២ភាគរយនៅក្នុងរយៈពេល៤ខែដំបូងនៃឆ្នាំ២០២១នេះ។ ហើយបើទោះបីជាថ្លៃដឹកជញ្ជូនមានការកើនឡើងជាងឆ្នាំមុនក្ដី ការនាំចេញផលិតផលសម្លៀកបំពាក់ ស្បែកជើង និងទំនិញធ្វើដំណើរ ដែលថយចុះ យ៉ាងខ្លាំងនៅខែមករាឆ្នាំ២០២១ ដោយថយចុះ១៣,២ភាគរយ ធៀបនឹងឆ្នាំមុន បានងើបឡើងវិញចាប់ពីពេលនោះ ដោយការនាំចេញផលិតផលសម្លៀកបំពាក៉ ស្បែកជើងនិងសម្ភារៈធ្វើដំណើរ បានកើនឡើង១០,២ភាគរយ នៅខែមីនា២០២១ និងបានកើនឡើង២៧,៨ភាគរយ នៅខែមេសា ឆ្នាំ២០២១។
នៅរយៈពេល៤ខែ ដំបូងនៃឆ្នាំ២០២១ ការនាំចេញកង់ក៏បានកើនឡើងដល់ទៅ៣២,៣ភាគរយ ហើយក្នុងអំឡុងពេលដូចគ្នានេះ ការនាំចេញយានយន្ត សម្ភារអគ្គិសនី និងឧបករណ៍អេឡិចត្រូនិកបញ្ចូលគ្នាបានកើនឡើង១៦,៤ភាគរយ។ របាយការណ៍ដដែលបង្ហាញថា ការនាំចេញផលិតផលសម្លៀកបំពាក់ និងវាយនភ័ណ្ឌលែងជាផលិតផលភាគច្រើននៃទំនិញនាំចេញទៀតហើយ។
ចំណែកនៃការនាំចេញសម្លៀកបំពាក់នៃទំនិញនាំចេញសរុបមិនរាប់បញ្ចូលមាស បានថយចុះមកត្រឹម៤៥,៦ភាគរយ នៅ៤ខែខែដំបូងនៃឆ្នាំ២០២១ ថយពី៥២,២ភាគរយនៅឆ្នាំ២០២០ និង៥៧,៦ភាគរយនៅឆ្នាំ២០១៩ ។
យ៉ាងណាក៏ដោយរបាយការណ៍ក៏បានបង្ហាញទៀតថា វិស័យសំណង់និងអចលនទ្រព្យ នៅតែបន្តថយចុះ ក្នុងនោះ រយៈពេល៤ដូចគ្នានេះ ទឹកប្រាក់នៃគម្រោងសាងសង់ដែលត្រូវបានអនុម័តបានថយចុះពី៤១,៥ភាគរយ នៅខណៈដែលការនាំចូលស៊ីម៉ង់ត៏ថយចុះ១៩,២ភាគរយ ការនាំចូលដែកថែប និងបរិក្ខាត្រជាក់ដូចជាម៉ាស៊ីនត្រជាក់ កើនឡើង ដោយការនាំចូលដែកថែបកើនឡើង៥,៤ភាគរយ ចំណែកការនាំចូលបរិក្ខារត្រជាក់វិញកើនឡើង២៤,១ភាគរយ។
វិនិយោគិនក្នុងស្រុកជាច្រើននៅតែមានសុទិដ្ឋិនិយមខ្ពស់ ចំពោះស្ថានភាពសេដ្ឋកិច្ចកម្ពុជាដោយថា រដ្ឋាភិបាលនឹងអាចទប់ស្កាត់ការរីករាលដាលនៃកូវីដ១៩ និងបញ្ចប់ព្រឹត្តិការណ៍២០ កុម្ភៈ ២០២១នេះបានឆាប់ៗហើយធ្វើឱ្យស្ថានភាពវិលទៅរកធម្មតាវិញ ដែលអាចទាក់ទាញ ការវិនិយោគពីក្នុងនិងក្រៅប្រទេសឡើងវិញជាពិសេសការវិនិយោគក្នុងវិស័យដែលកំពុងមានអាទិភាពក្នុងប្រទេស៕