ដោយៈសាវុធ
ភ្នំពេញៈ ឯកអគ្គរដ្ឋទូតចិនប្រចាំកម្ពុជា បានសរសេរសំណេរក្នុងអត្ថបទមួយ សម្រាប់សៀវភៅមួយស្តីពី “ការកាត់បន្ថយភាពក្រីក្រសម្រាប់មនុស្សជាតិ” ថាចិនព្យាយាមធ្វើយ៉ាងណាឱ្យប្រជាជនកម្ពុជា ដែលជាបងប្អូនរបស់ចិន មានជីវភាពរស់នៅកាន់តែល្អប្រសើរក្នុងនាមជាអ្នកជិតខាងល្អ មិត្តល្អ ដៃគូល្អ និងជាបងប្អូនល្អ។
លោក Wang Wentian ឯកអគ្គរដ្ឋទូតចិនប្រចាំកម្ពុជា បានសរសេរសំណេរអត្ថបទសម្រាប់សៀវភៅក្រោមចំណងជើងថា “ការអនុវត្តរបស់ចិនសម្រាប់មនុស្សជាតិ ក្នុងការកាត់បន្ថយភាពក្រីក្រ” ដែលចេញផ្សាយដោយ ការិយាល័យព័ត៌មាននៃក្រុមប្រឹក្សាកិច្ចការរដ្ឋចិន កាលពីថ្មីៗនេះ។
លោកបានសរសេររៀបរាប់ថា ចិននិងកម្ពុជា គឺជាប្រទេសកំពុងអភិវឌ្ឍន៍ ហើយក៏មានភារកិច្ចសំខាន់ក្នុងការអភិវឌ្ឍន៍សេដ្ឋកិច្ច និងលើកកម្ពស់ជីវភាពរស់នៅរបស់ប្រជាជនផងដែរ។
លោកបានបន្តថា ”ក្នុងនាមជាអ្នកជិតខាងល្អ មិត្តល្អ ដៃគូល្អ និងជាបងប្អូនល្អ ចិនតែងជួយប្រជាជនកម្ពុជា ក្នុងការកាត់បន្ថយភាពក្រីក្រ ខិតខំធ្វើយ៉ាងណាឱ្យប្រជាជនកម្ពុជាដែលជាបងប្អូនរបស់ចិន មានជីវភាពរស់នៅកាន់តែល្អប្រសើរ” ។
ជាមួយគ្នានេះដែរ លោកបានឱឲ្យដឹងថា នាខែមករា ឆ្នាំ២០២១ គម្រោង ភូមិគំរូមិត្តភាពចិន និងកម្ពុជា សម្រាប់ការកាត់បន្ថយភាពក្រីក្រ ត្រូវបានចាប់ផ្តើមដំណើរការជាផ្លូវការក្នុង ស្រុកបាទី ខេត្តតាកែវ ដែលគម្រោងខាងលើនេះ ជាការផ្តួចផ្តើមរួមគ្នាដោយមូលនិធិ ដើម្បីសន្តិភាពនិង ការអភិវឌ្ឍ និងវេទិកាសម្ព័ន្ធសង្គមស៊ីវិលកម្ពុជា បានក្លាយជាព្រឹត្តិការណ៍ដ៏សំខាន់មួយសម្រាប់កិច្ចសហ ប្រតិបត្តិការកាត់បន្ថយភាពក្រីក្ររវាងប្រទេសទាំងពីរ។
លោកជឿជាក់ថា ស្ថិតក្រោមការខិតខំរួមគ្នារបស់ភាគីទាំងពីរ គម្រោងនេះនឹងដឹកនាំប្រជាជនក្នុងមូលដ្ឋាន ឆ្ពោះទៅរកមាគ៌ានៃការកាត់បន្ថយភាពក្រីក្រ និងមានភាពធូរធារ ហើយនឹងក្លាយជាចំណុចគំរូ និងចំណុចចាប់ផ្តើមថ្មី សម្រាប់ការងារកាត់បន្ថយភាពក្រីក នៅក្នុងប្រទេសកម្ពុជា។
ពេលបច្ចុប្បន្ននេះ ប្រជាជនបណ្តាប្រទេសលើពិភពលោក កំពុងខិតខំប្រឹងប្រែងដើម្បីកសាង ពិភពលោកមួយដែលប្រកបដោយសន្តិភាពយូរអង្វែង សន្តិសុខទាំងស្រុង រុងរឿងវិបុលភាពរួមគ្នា បើកចំហរ អត់ឱនគ្នា និងប្រកបដោយភាពស្រស់ស្អាត។
លោកឯកអគ្គរដ្ឋទូតបានបន្តថា ចិនរីករាយបន្តចែករំលែកបទពិសោធន៍កាត់បន្ថយ ភាពក្រីក្រ ជាមួយបណ្តាប្រទេសកំពុងអភិវឌ្ឍន៍រួមទាំងប្រទេសកម្ពុជា ពង្រឹងការប្រាស្រ័យគ្នាលើ យុទ្ធសាស្ត្រអភិវឌ្ឍន៍លើកកម្ពស់កិច្ចសហប្រតិបត្តិការ ដែលផ្តល់អត្ថប្រយោជន៍គ្នាទៅវិញទៅមកនិង ប្រកបដោយភាពជាក់ស្តែង។
លោក Wang Wentian បានថ្លែងថា “ចូរយើងពួតដៃគ្នាឆ្ពោះទៅមុខដោយអង់អាចដើម្បីកិច្ចការកាត់បន្ថយភាពក្រីក្រលើសកលលោក រួមគ្នាកសាងភាពត្រចះត្រចង់នាពេលអនាគតសម្រាប់ការអភិវឌ្ឍន៍និង ប្រកបដោយវិបុលភាពដល់មនុស្សជាតិគ្រប់រូប” ។
អស់រយៈពេលជាង៧០ឆ្នាំ បន្ទាប់ពីការបង្កើតសាធារណរដ្ឋប្រជាមានិតចិនមក ប្រទេសចិន បានផ្តល់ជំនួយក្រោមទម្រង់រូបភាពជាច្រើន ដល់ជាង១៦០ប្រទេស និងអង្គការអន្តរជាតិ រួមមានក្នុងតំបន់អាស៊ី អាហ្វ្រិក អាមេ រិកឡាទីន រ៉ាប៊ីន អូសេអានី និងអឺរ៉ុបជាដើម បានជួយកាត់បន្ថយលើកលែងបំណុលរបស់ប្រទេស ជាប់ពាក់ព័ន្ធ បានផ្តល់ការគាំទ្រនិងការជួយយ៉ាងពេញទំហឹង ដល់ប្រទេសកំពុងអភិវឌ្ឍន៍ជាច្រើនក្នុងការ អនុវត្តគោលដៅអភិវឌ្ឍន៍សហស្សវត្សរ៍។
យោងតាមរបាយការណ៍ស្រាវជ្រាវរបស់ធនាគារពិភពលោក បានឱ្យដឹងថា ការរួមគ្នាកសាង ខ្សែក្រវាត់និងផ្លូវ អាចជួយដល់ប្រជាជន នៃប្រទេសពាក់ព័ន្ធជាង៧៦លាននាក់រួចផុតពីភាពក្រីក្រខ្លាំង ហើយក៏មានប្រជាជនចំនួនប្រហែល៣២លាននាក់ អាចរួចផុតពីភាពក្រីក្រកម្រិតមធ្យម។ នៅពេលអនាគត ចិននឹងចូលរួមកាន់តែស៊ីជម្រៅ នៅក្នុងអភិបាលកិច្ចភាពក្រីក្រលើពិភពលោក និងចូលរួមចំណែកថ្មីៗកាន់តែច្រើន ដល់ការកសាងពិភពលោកប្រកបដោយលក្ខណៈគ្មាន ភាពក្រីក្រនិងការអភិវឌ្ឍន៍រួមគ្នា៕