ដោយៈ សាវុធ
ភ្នំពេញៈ សហគ្រិនគ្រប់រូប នៅពេលគាត់ចាប់ផ្តើមអាជីវកម្មដំបូង គាត់មិនសូវជាមានដើមទុនច្រើនប៉ុន្មានទេ ប៉ុន្តែពួកគាត់ច្រើនតែមានគំនិតជាដើមទុនតែម្តង។
ប្រសិនបើអ្នកជាបុគ្គលម្នាក់ ក្នុងចំណោមសហគ្រិនទាំងនោះ សូមកុំមានការព្រួយបារម្ភរឿងដើមទុនអី វិធីសាស្ត្រមួយចំនួននេះ នឹងជួយឱ្យអ្នកចំណាយប្រាក់តិចតួច ពេលចាប់ផ្តើមអាជីវកម្មដំបូង៖
ទី១) រកជួលទីតាំងដែលមានលក្ខណៈអំណោយផលសម្រាប់សហគ្រិនភាព
ពេលចាប់ផ្តើមអាជីវកម្មដំបូង អ្នកតែងគិតគូរកទីតាំងសមស្រប សម្រាប់អាជីវកម្មរបស់អ្នក។ សព្វថ្ងៃនៅក្នុងក្រុងភ្នំពេញនេះ វិស័យស្ថាបត្យកម្មក៏មានការរីកចម្រើនយ៉ាងខ្លាំងក្លា មានអាគារខ្ពស់ច្រើនសន្ធឹកសន្ធាប់ ដូច្នេះអ្នកអាចរកជួលអាគារ ឬរកទីតាំងណាដែលគេធ្វើការលក្ខណៈចែករំលែក ទីតាំងក្នុងការធ្វើការ ( Coworking space)។
ទី២) រកប្រព័ន្ធផ្សព្វផ្សាយដែលមានតម្លៃសមរម្យ
នៅពេលអ្នកប្រកបអាជីវកម្ម ដើម្បីអោយមានគេស្គាល់ច្រើន អ្នកគួរតែធ្វើការផ្សព្វផ្សាយពីផលិតផល ឬសេវាកម្មតាមវិធីសាស្ត្រផ្សេង។ ដោយសារបណ្ដាញសង្គមហ្វេសប៊ុកសព្វថ្ងៃនេះ មានការពេញនិយមលេង ស្ទើគ្រប់ស្រទាប់រណ្ណៈទាំងអស់ ដូចនេះអ្នកអាចផ្សព្វផ្សាយពីផលិតផល ឬសេវាកម្មរបស់អ្នកបានដោយចំណាយតិចទៀតផង។
វិធីមួយទៀតអ្នកអាចរកដៃគូសហការ ដែលជាអ្នកឧបត្ថម្ភដល់ការផ្សព្វផ្សាយរបស់អាជីវកម្មអ្នកក៏បាន។
ទី៣) ចែករំលែកបទពិសោធន៍ការងារដល់បុគ្គលិករបស់អ្នក
ពេលបង្កើតអាជីវកម្មមួយច្បាស់ណាស់ គឺត្រូវការបុគ្គលិកមកជួយធ្វើការអ្នក ព្រោះអ្នកមិនអាចរ៉ាប់រងការងារទាំងអស់ម្នាក់ឯងបានឡើយ។ ដូច្នេះហើយដើម្បីអោយអ្នកចំណាយប្រាក់តិច ទៅលើថ្លៃកម្លាំងពលកម្ម អ្នកអាចស្វែងរកបុគ្គលិកដែលជានិស្សិតកំពុងសិក្សា ឬទើបនឹងបញ្ចប់ការសិក្សាលើជំនាញ ដែលពាក់ព័ន្ធនឹងអាជីវកម្មអ្នក ដែលពួកគាត់មិនទាន់មានបទពិសោធន៍នៅឡើយ។
អ្នកអាចផ្តល់ឱកាសអោយពួកគាត់ ទទួលបានបទពិសោធន៍ពីការងារនេះ ហើយអ្នកអាចផ្តល់ប្រាក់ឧបត្ថម្ភជូនគាត់បន្តិចបន្តួចទៅ គាត់ប្រាកដជារីករាយក្នុងការធ្វើការជូនអ្នកមិនខាន។
អ្នកនឹងលែងមានការបារម្ភទៀតហើយ ប្រសិនបើអ្នកចង់បង្កើតអាជីវកម្ម ប៉ុន្តែអ្នកមានប្រាក់តិចតួច ព្រោះអ្នកបានដឹងពីតិចនិក ដែលស្ពានបានស្វែងរក ដើម្បីជួយអ្នកសន្សំប្រាក់បានខ្លះ ដោយកាត់បន្ថយពីការចំណាយប្រាក់ច្រើន មកចំណាយតិចតូចវិញ៕ Spean៕
