ដោយៈ សាវុធ
ភ្នំពេញៈ មនុស្សម្នាក់ៗមានក្តីស្រមៃមិនដូចគ្នាទេ អ្នកខ្លះចង់ក្លាយជាគ្រូបង្រៀន ជាគ្រូពេទ្យ ជាមេធាវី ជាអ្នកគ្រប់គ្រង ហើយអ្នកខ្លះទៀតចង់ក្លាយជាអ្នកជំនួញជាដើម។ ចំពោះអ្នកដែលចង់ក្លាយជាអ្នកជំនួញ តើមានសញ្ញាណអ្វីខ្លះ ដែលបញ្ជាក់ថាខ្លួនអ្នកអាចក្លាយជាអ្នកជំនួញមួយរូបបាន?។
ខាងក្រោមនេះ ជាសញ្ញាណ៥ចំណុចដែលយើង នឹងលើកយកមកបង្ហាញពីលក្ខណៈដែលបង្ហាញថាអ្នកអាចក្លាយជាសហគ្រិនមួយរូបបាន៖
ទី១) អ្នកជាមនុស្សដែលជឿជាក់លើខ្លួនឯង មិនងាយជឿអ្នកដទៃ
ការមានទំនុកចិត្តលើខ្លួនឯង ជាកម្លាំងជំរុញដ៏ខ្លាំងក្លាសម្រាប់ខ្លួនអ្នក។ វាធ្វើអោយអ្នកដើរទៅមុខរហូត ដោយគ្មានភាពរុញរា ទោះបីមានឧបសគ្គយ៉ាងណាក៏ដោយ។ អ្នកជាមនុស្សដែលម៉ត់ចត់នឹងការងារ គិតគូរបានវែងឆ្ងាយ អ្នកចេះលើកទឹកចិត្តខ្លួនឯង ទុកចិត្តនិងជឿជាក់ នឹងអ្វីដែលអ្នកកំពុងធ្វើគ្មាននរណាម្នាក់ មកបណ្តុះបង្អាប់គំនិតរបស់អ្នកអោយអ្នកបោះបង់គំនិតខ្លួនឯង ហើយទទួលយកគំនិតគេជំនួសវិញបានឡើយ។
ទី២) អ្នកជាមនុស្សដែលចូលចិត្តស្វែងរកអ្វីដែលថ្មីសម្រាប់ខ្លួនឯង
អ្នកជាមនុស្សដែលស្រលាញ់ការរៀនសូត្រ ចង់ចេះចង់ដឹងនូវអ្វីដែលថ្មីដែលអ្នកមិនធ្លាប់ដឹងពីមុនមក។ អ្នកចូលចិត្តការផ្សងព្រង ដែលធ្វើអោយអ្នករៀនសូត្របានច្រើនពីដំណើរនៃការផ្សងព្រេងនោះ។ នៅពេលដែលអ្នកផ្សេងព្រេង វានឹងធ្វើអោយអ្នកហ៊ានប្រថុយប្រថាន ហ៊ានធ្វើការសម្រេចចិត្តដោយគ្មានភាពរុញរា។
តួយ៉ាងនៅពេលដែលអ្នកបង្កើតអាជីវកម្មមួយ មានរឿងជាច្រើនដែលអ្នកត្រូវប្រឈមហើយ រៀនដោះស្រាយរាល់បញ្ហា ដែលនឹងកើតដោយគ្មានការរំពឹងទុក។ ដូច្នេះបើអ្នកជាមនុស្សដែលដែល ចូលចិត្តការរៀនសូត្រ ស្រាប់ហើយ មិនមានបញ្ហាអ្វីឡើយសម្រាប់អ្នក។
ទី៣) អ្នកជាមនុស្សដែលមានគំនិតបង្កើតថ្មី
ប្រាកដណាស់ក្នុងនាមអ្នកជាអ្នករកស៊ីម្នាក់ អ្នកត្រូវតែជាមនុស្សដែលមានគំនិត ថ្មីៗ គិតនូវអ្វីប្លែកខុសពីគេ ជាអ្នកដែលពូកែមើលឃើញឱកាស ចាប់យកឱកាសនិងហ៊ានប្រថុយប្រថាន នឹងឧបសគ្គគ្រប់បែបយ៉ាង ដើម្បីទទួលបានភាពជោគជ័យ។ អ្នកជាបុគ្គលដែលស្រលាញ់ការបង្កើតថ្មី ដែលជាចំនុចអំណោយផល អោយអ្នកអាចក្លាយជាអ្នកជំនួញជោគជ័យបាន ព្រោះអ្នកពូកែនិងមានគំនិតថ្មីៗរហូត។
ទី៤) អ្នកជាមនុស្សមានជំនាញក្នុងការទំនាក់ទំនង
ការទំនាក់ទំនង មិនមែនជារឿងឥតប្រយោជន៍ឡើយ។ ពេលដែលអ្នកមានទំនាក់ទំនងល្អ វាជាអំណោយ ផលមួយដល់ល្អសម្រាប់អ្នក ជាឱកាសមួយដែលធ្វើអោយអ្នកទទួលបានការស្រលាញ់រាប់អាន និងចូល ចិត្តពីអ្នកគ្រប់គ្នានៅជុំវិញខ្លួនអ្នក ហើយវាក៏ជាឱកាសមួយដែលធ្វើអោយអ្នកទទួលបានជោគជ័យក្នុង អាជីវកម្មផងដែរ។
ទី៥) អ្នកមានគំនិតជាអ្នកដឹកនាំ
អ្នកគឺជាមនុស្សដែលចេះប្រើមនុស្ស អោយត្រូវតាមចំណេះជំនាញរបស់គេរៀងៗខ្លួន។ មិនតែប៉ុណ្ណោះ អ្នកជាមនុស្សដែលមានភាពឈ្លាសវៃ ចេះបត់បែនតាមកាលៈទេសៈ ចេះប្រើប្រាស់ពេលវេលានិង គ្រប់គ្រងវាអោយបានល្អ ដែលចេះយកលុយទៅបង្កើតលុយធ្វើអោយអ្នកទទួលបានជោគជ័យក្នុង អាជីវកម្ម។ពូកែក្នុងការសង្កេតល្អិតល្អន់គ្រប់ជ្រុងជ្រោយ។ អ្នកជាមនុស្ស ដែលចេះយកលុយទៅបង្កើតលុយ បន្ទាប់ពីចេះបង្កើតអ្នកក៏ចេះគ្រប់គ្រងលុយផងដែរ។
ថ្វីត្បិតថាគំនិតខាងលើនេះ មិនអាចបញ្ជាក់បានទាំងស្រុងមែន ប៉ុន្តែស្ពានសង្ឃឹមថា វានឹងជួយអ្នកបានខ្លះ ដើម្បីអោយអ្នកដឹងថា ខ្លួនឯងបានត្រៀមខ្លួនរួចរាល់ហើយឬនៅ ដើម្បីប្រឡូកក្នុងវិស័យពាណិជ្ជកម្ម។
ប្រសិនបើអ្នកមិនទាន់មានចំណុចទាំងនេះទេ អ្នកអាចចាប់ផ្តើមពង្រឹងវាពីឥលូវនេះបាន។ “”អ្នកត្រូវចងចាំថា កុំបោះបង់ក្តីសង្ឃឹមរបស់អ្នកអោយសោះ ដរាបណាមានសង្ឃឹមអ្នកនឹងទទួលបាន ជោគជ័យនៅថ្ងៃណាមួយ”៕ Spean៕
