ដោយៈលក្ខិណា
ភ្នំពេញៈ បុគ្គលដែលពឹងផ្អែកតែលើប្រាក់ខែ ក្នុងអំឡុងពេលវិបត្តិកូវីដ១៩នេះ គួរតែបង្កើតជំនាញ និងស្វែងរកចំណូលក្រៅម៉ោងធ្វើការ ដើម្បីទប់ស្កាត់ការធ្លាក់ចូលទៅក្នុងជ្រោះនៃវិបត្តិសេដ្ឋគ្រួសារ ។ នេះបើតាមលោកង៉ែត ជូ សេដ្ឋវិទូមួយរូបនៅកម្ពុជា។
លោកង៉ែត ជូ អ្នកជំនាញផ្នែកហិរញ្ញវត្ថុ និងសេដ្ឋកិច្ចបានសរសេរនៅលើបណ្ដាញសង្គមរបស់លោកកាលពីសប្តាហ៍មុនថា បុគ្គលដែលមានជីវភាព ពឹងផ្អែកលើប្រាក់ខែតែមួយមុខ គួរយកឱកាសនៃការបិទខ្ទប់នេះ សិក្សាស្រាវជ្រាវស្វែងយល់ពីឱកាស និងបង្កើតជំនាញថ្មីៗ ដើម្បីអាចរកចំណូលក្រៅម៉ោងធ្វើការ ដែលនៅអាមេរិកគេហៅថា “Side Hustle” ។
លោកបន្តថា “យើងមិនដឹងថាវិបត្តិនេះនឹងអូសបន្លាយដល់ពេលណា? ហើយធ្ងន់ធ្ងររហូតដល់ក្រុមហ៊ុន និងស្ថាប័នជាច្រើនបន្តបិទទ្វារឬយ៉ាងណា? បើដូច្នេះមែន នោះការពឹងផ្អែកតែប្រាក់ខែមួយមុខ ប្រឈមនឹងហានិភ័យធំណាស់ ព្រោះមនុស្សជាច្រើនបានទិញផ្ទះបង់រំលស់ មានបំណុលធនាគារ ត្រូវបង់ថ្លៃសាលាកូន និងត្រូវរ៉ាប់រងចំណាយក្នុងគ្រួសារ” ។
ជាមួយគ្នានេះ លោកបណ្ឌិតគី សេរីវឌ្ឍន៍ អ្នកវិភាគសេដ្ឋកិច្ចកម្ពុជាមួយរូបក៏បាន ឱ្យដឹងផងដែរថា ព្រឹត្តិការណ៍២០កុម្ភៈ ២០២១នេះ ដែលឈានដល់ការបិទអាជីវកម្ម បិទចរាចរណ៍បែបនេះ គឺពិតជាប៉ះពាល់ដល់សេដ្ឋកិច្ចធំធេងណាស់ តែដើម្បីសុវត្ថិភាពរដ្ឋាភិបាល ត្រូវបង្ខំចិត្តបិទបែបនេះរយៈពេលខ្លី ដោយមិនបណ្ដែតបណ្ដោយឱ្យជំងឺនេះអូសបន្លាយកាន់តែយូរ ។
ក្រុមសង្គមស៊ីវិល ជាច្រើនក៏បានគាំទ្រនូវចំណាត់ការ របស់រដ្ឋាភិបាលក្នុងការទប់ស្កាត់ការឆ្លងរីករាលដាលបន្តទៀត ក្នុងសហគមន៍ខណៈរហូតមកដល់ពេលនេះ តួលេខអ្នកឆ្លងកូវីដ១៩ នៅកម្ពុជាមានចំនួនដល់ទៅជាង៦០០០នាក់ និងអ្នកឆ្លងក្នុងសហគមន៍ព្រឹត្តិការណ៍២០ កុម្ភៈ មានរហូតដល់៥២២៨នាក់ ក្នុងរយៈពេលតែប្រមាណ២ខែប៉ុណ្ណោះ។
ពាក់ព័ន្ធនឹងការបិទខ្ទប់រាជធានីភ្នំពេញ និងក្រុងតាខ្មៅ បណ្ដាក្រុមហ៊ុននិងសហគ្រាសជាច្រើន ក៏បានអនុញ្ញាតឱ្យបុគ្គលិកនិយោជិករបស់ខ្លួន ធ្វើការពីផ្ទះសម្រាប់អ្នកដែលអាចធ្វើបាន ហើយក៏មានក្រុមហ៊ុន និងសហគ្រាសមួយចំនួនទៀត បានបង្ខំផ្អាកសកម្មភាពការងារមួយរយៈពេលផងដែរ ដើម្បីចូលរួមទប់ស្កាត់ការឆ្លងជំងឺកូវីដ១៩នេះ ៕
