ជប៉ុនចាប់ផ្តើមបង្ហូរទឹកសំណល់ដំណាក់កាលទី២ ចេញពីរោងចក្រថាមពលនុយក្លេអ៊ែរចូលទៅក្នុងមហាសមុទ្រ

ដោយៈ តែម សុខុម

តូក្យូ: ប្រទេសជប៉ុន បានចាប់ផ្តើមដំណាក់កាលទី២ នៃការបង្ហូរទឹកសំណល់ ដែលត្រូវបានធ្វើប្រព្រឹត្តកម្មរួច ចេញពីរោងចក្រថាមពលនុយក្លេអ៊ែរ Fukushima ចូលទៅក្នុងមហាសមុទ្រប៉ាស៊ីហ្វិក នៅថ្ងៃព្រហស្បតិ៍ ទី៥ ខែតុលា កន្លងមកនេះ។

ការបង្ហូរដំណាក់កាលទី២នេះធ្វើឡើង បន្ទាប់ពីដំណាក់កាលទី១ ត្រូវបានអនុវត្តន៍ក្នុងដែនកំណត់សុវត្ថិភាព ដែលបានបង្កើតឡើងនៅចន្លោះថ្ងៃទី២៤ ខែសីហា ដល់ថ្ងៃទី១១ ខែកញ្ញា ឆ្នាំនេះ។

យោងតាមសេចក្ដីរាយការណ៍ របស់ប្រព័ន្ធផ្សព្វផ្សាយជប៉ុនបានឱ្យដឹងថា ដំណាក់កាលទី២ នៃការបង្ហូរទឹកសំណល់នេះ គ្រោងចាប់ផ្តើមនៅម៉ោង១០:៣០ព្រឹក ហើយបន្តរហូតដល់ថ្ងៃទី២៣ ខែតុលា ដោយបរិមាណ នៃការបង្ហូរចេញសរុបមានចំនួន៧.៨០០តោន ដែលប្រហាក់ប្រហែលគ្នា នឹងការបង្ហូរចេញក្នុងដំណាក់កាលទី១។

តាមការរំពឹងទុក ការបង្ហូរទឹកសំណល់ចេញនេះ នឹងបរិមាណ៤៦០តោនក្នុងមួយថ្ងៃ។ក្រុមហ៊ុន Tokyo Electric Power Co. ដែលជាប្រតិបត្តិកររបស់រោងចក្រខាងលើនេះ គ្រោងបង្ហូរទឹក សំណល់ដែលរក្សាទុកក្នុងធុងទឹក បន្ទាប់ពីត្រូវបានធ្វើប្រព្រឹត្តកម្ម តាមរយៈប្រព័ន្ធបន្សុទ្ធមានឈ្មោះថា ALPS ចាប់តាំងពីរោងចក្រ ថាមពលនុយក្លេអ៊ែរខាងលើនេះបានផ្ទុះខូចនៅខែមីនា ឆ្នាំ២០១១ តាមផ្លូវរូងក្រោមបាតសមុទ្រដែលលាតសន្ធឹងប្រវែង១គីឡូម៉ែត្រ ចូលទៅក្នុងមហាសមុទ្រ។

ប្រព័ន្ធបន្សុទ្ធ ALPS អាចចម្រោះកម្ចាត់ចោលនូវសារធាតុវិទ្យុសកម្មចំនួន៦២ប្រភេទ លើកលែងតែសារធាតុ Tritium ដែលអាចត្រូវបានកាត់បន្ថយ ដល់កម្រិតសុវត្ថិភាពជាអន្តរជាតិ តាមរយៈការលាយចូលជាមួយទឹកសមុទ្រ៕ Korea Times៕