ដោយ: គង់ លាងហួរ
គូឡាឡាំពួរ: ក្រុមហ៊ុនអាកាសចរណ៍តម្លៃទាប របស់ប្រទេសម៉ាឡេស៊ី Firefly Airlines គ្រោងនឹងចាប់ផ្តើមជើងហោះហើរត្រង់ រវាងអាកាសយានដ្ឋានអន្តរជាតិ Penang និងអាកាសយានដ្ឋាន Changi របស់ប្រទេសសិង្ហបុរី ចាប់ពីថ្ងៃទី២៦ ខែមីនា។
យោងតាមសេចក្តីថ្លែងការណ៍មួយ នៅថ្ងៃសុក្រទី៣ ខែមីនា ក្រុមហ៊ុនអាកាសចរណ៍ម៉ាឡេស៊ីនេះបាននិយាយថា ខ្លួននឹងដំណើរការផ្លូវហោះហើរ រវាងទីក្រុងទាំង២ចំនួន២ដងជារៀងរាល់ថ្ងៃ។
ជើងហោះហើរនោះ នឹងចាកចេញពីទីក្រុង Penang នៅម៉ោង១០ព្រឹក និង៦:៣៥នាទីល្ងាច ខណៈជើងហោះហើរនឹងត្រឡប់មកពីសិង្ហបុរីវិញ នៅម៉ោង១២:៤០នាទីរសៀល និងម៉ោង៩:១៥នាទីយប់។
ក្រុមហ៊ុនអាកាសចរណ៍ Firefly ដែលជាក្រុមហ៊ុនបុត្រសម្ព័ន្ធរបស់ Malaysia Aviation Group (MAG)នឹងដំណើរការជើងហោះហើរចេញពីស្ថានីយលេខ២ នៅអាកាសយានដ្ឋាន Changiរបស់ប្រទេសសិង្ហបុរី។
ជើងហោះហើរនេះ នឹងត្រូវដំណើរការដោយយន្តហោះ Boeing 737-800 ដែលត្រូវបានកែលម្អឡើងវិញ និងបំពាក់ដោយកៅអីចំនួន១៨៩កៅអី។
ក្រុមហ៊ុនអាកាសចរណ៍បានអះអាងថា សំបុត្រសម្រាប់ជើងហោះហើរត្រង់ទៅកាន់ទីក្រុង Penang ត្រូវបានដាក់លក់ចាប់ពីថ្ងៃសុក្រ។ តម្លៃសំបុត្រទៅប្រទេសសិង្ហបុរីចាប់ផ្តើមពី RM១០៩(២៤,៣ដុល្លារ) ខណៈតម្លៃសំបុត្រទៅទីក្រុង Penang ចាប់ផ្តើមពី RM២៦៩(៦០,១ដុល្លារ)៕
