ដោយៈ សុខុម
សិង្ហបុរី: ប្រព័ន្ធស្តុកថាមពលដ៏ធំបំផុត ប្រចាំតំបន់អាស៊ីអាគ្នេយ៍ ត្រូវបានដាក់ឱ្យដំណើរការជាផ្លូវការនៅលើកោះ Jurong Island របស់សិង្ហបុរី កាលពីថ្ងៃព្រហស្បតិ៍ ទី០២ ខែកុម្ភៈ ហើយនេះគឺជាជំហានថ្មីមួយទៀតនៅក្នុងការជំរុញការប្រើប្រាស់ថាមពលសូឡា (ពន្លឺព្រះអាទិត្យ) នៅក្នុងប្រទេសនេះ។
ប្រព័ន្ធផ្ទុកថាមពលដែលមានឈ្មោះថា Sembcorp Energy Storage System នេះមានសមត្ថភាព ផ្ទុកអតិបរមា២៨៥មេហ្គាវ៉ាត់ម៉ោង (MWh) ដែលអាចបំពេញតម្រូវការអគ្គិសនី ដល់ផ្ទះពលរដ្ឋប្រមាណ២៤.០០០ផ្ទះ។
ទីតាំងប្រព័ន្ធផ្ទុកថាមពលនេះ លាតសន្ធឹងលើផ្ទៃដី២ហិកតា ដែលជិតស្មើតារាងបាល់ទាត់៣ ហើយបានចាប់ផ្ដើមដំណើរការកាល ពីចុងខែធ្នូ ឆ្នាំមុន។ អាជ្ញាធរទីផ្សារថាមពល (EMA) បានចាត់តាំងឱ្យក្រុមហ៊ុន Sembcorp Industries អភិវឌ្ឍប្រព័ន្ធនេះឡើងនៅខែមិថុនា ឆ្នាំ២០២២។
លោកស្រី Jeanette Lim នាយកផ្នែកអភិវឌ្ឍន៍ឧស្សាហកម្មរបស់ EMA លើកឡើងថា អាជ្ញាធរ EMA តម្រូវឱ្យប្រព័ន្ធផ្ទុកថាមពលសាងសង់បញ្ចប់ជាស្ថាពរនៅត្រឹមខែធ្នូ ឆ្នាំមុន ដោយសារមើលឃើញការបន្តរីកចម្រើននៅក្នុងទីផ្សារថាមពលពិភពលោក។
លោកស្រីបានបន្ថែមទៀតថា កន្លែងស្តុកថាមពលនេះ អាចផ្ដល់ថាមពល រក្សាទុក និង/ឬផ្ដល់សេវាកម្មគ្រប់គ្រង ដើម្បីពង្រឹងភាពធន់នៃបណ្តាញផ្គត់ផ្គង់អគ្គិសនីរបស់សិង្ហបុរី និងគ្រប់គ្រងទីផ្សារ ព្រមទាំងការប្រែប្រួលនៃការផ្គត់ផ្គង់ថាមពលផងដែរ។
លោក Ngiam Shih Chun ប្រធានអាជ្ញាធរ EMA ថ្លែងថា ប្រព័ន្ធស្តុកទុកថាមពលនេះ នឹងអនុវត្តតាមកិច្ចខិតខំប្រឹងប្រែង របស់អាជ្ញាធរ EMA ដើម្បីប្រើប្រាស់ថាមពលសូឡាឱ្យបានអតិបរមា ព្រមទាំងធ្វើឱ្យប្រសើរឡើងនូវស្ថិរភាព និងភាពធន់នៃបណ្ដាញផ្គត់ផ្គង់អគ្គិសនី របស់សិង្ហបុរីផងដែរ។
ទោះជាយ៉ាងណា គ្មានការបញ្ជាក់ពីទំហំទុនវិនិយោគសម្រាប់គម្រោងនេះឡើយ៕ CNA៕
