ដោយៈសុខុម
វ៉ាស៊ីនតោន: ប្រភពបានទម្លាយឱ្យដឹងថា ក្រុមហ៊ុនផលិតអាគុយកូរ៉េខាងត្បូង LG Chem និងក្រុមហ៊ុនកូរ៉េខាងត្បូង SK Innovation ដែលជាគូប្រជែងនឹងគ្នាបានព្រមព្រៀងដោះស្រាយបញ្ចប់ជម្លោះការសម្ងាត់ពាណិជ្ជកម្ម ដែលបានគំរាមកំហែងដល់រោងដ៏សំខាន់មួយនៅរដ្ឋចចជា (Georgia) សហរដ្ឋអាមេរិក និងគម្រោងផលិតរថយន្តអគ្គិសនី (EV) របស់ក្រុមហ៊ុន Ford Motor និងក្រុមហ៊ុន Volkswagen។ នេះបើយោងតាមការចុះផ្សាយរបស់សារព័ត៌មាន CNA។
កាលពីថ្ងៃអាទិត្យ ទី១១ មេសា ជាឱសានវាទរបស់រដ្ឋការលោកចូ បៃដិន តាមរយៈការិយាល័យតំណាងពាណិជ្ជកម្មសហរដ្ឋអាមេរិក (USTR) ថាតើត្រូវចាត់វិធានការដ៏កម្រដើម្បីកែប្រែសេចក្តីសម្រេច របស់គណៈកម្មការពាណិជ្ជកម្មអន្តរជាតិ (ITC) របស់សហរដ្ឋអាមេរិក ឬយ៉ាងណា ប្រសិនបើក្រុមហ៊ុនទាំងនេះ មិនឈានដល់ការព្រមព្រៀងបញ្ចប់ជម្លោះទេនោះ។
ប្រភពដដែលឱ្យដឹងទៀតថា សេចក្ដីប្រកាសអំពីដំណោះស្រាយរបស់ក្រុមហ៊ុនផលិតអាគុយខាងលើនេះ នឹងត្រូវធ្វើឡើងនៅពេលឆាប់។
កិច្ចព្រមព្រៀងនេះ គឺជាជ័យជម្នះមួយសម្រាប់ប្រធានាធិបតី ចូ បៃឌិន ដែលបានធ្វើឱ្យការជំរុញផលិតរថយន្តអគ្គិសនី និងការផលិតអាគុយរបស់សហរដ្ឋអាមេរិក ក្លាយជាគោលនយោបាយអាទិភាពកំពូល។ ឧស្សាហកម្មផលិតរថយន្តទូទាំងពិភពលោក កំពុងប្រណាំងប្រជែងគ្នា អភិវឌ្ឍរថយន្តអគ្គិសនី ហើយលោក ចូ បៃដិន ក៏បានស្នើថវិការហូតដល់ទៅ១៧៤ពាន់លានដុល្លារ ដើម្បីបង្កើនការលក់រថយន្តអគ្គិសនី និងពង្រីកហេដ្ឋារចនាសម្ព័ន្ធសាកអាគុយរថយន្ត។
កិច្ចព្រមព្រៀងនេះ បានបញ្ចប់ជម្លោះដ៏ល្វីងជូរចត់រយៈពេល២ឆ្នាំ រវាងក្រុមហ៊ុនបុត្រសម្ព័ន្ធ នៃក្រុមហ៊ុនយក្សទាំង២របស់កូរ៉េខាងត្បូង។ បន្ទាប់ពីចាញ់ក្រុមហ៊ុន SK Innovation នៅក្នុងការដណ្ដើមកិច្ចព្រមព្រៀងបញ្ជាទិញរបស់ក្រុមហ៊ុន Volkswagen ក្រុមហ៊ុន LG Chem បានចោទប្រកាន់ក្រុមហ៊ុន SK Innovation ថាបានលួចការសម្ងាត់ពាណិជ្ជកម្មរបស់ខ្លួន តាមរយៈការអូសទាញបុគ្គលិករបស់ខ្លួនជិត៨០នាក់។
គណៈកម្មការពាណិជ្ជកម្មអន្តរជាតិ កាលពីខែកុម្ភៈ បានគាំទ្រក្រុមហ៊ុន LG Chem បន្ទាប់ពីក្រុមហ៊ុននេះ បានចោទប្រកាន់ក្រុមហ៊ុន SK Innovation ពីបទលួចការសម្ងាត់អាថ៌ពាណិជ្ជកម្ម ទាក់ទិនបច្ចេកវិទ្យាអាគុយរថយន្តអគ្គិសនី ហើយបានចេញបម្រាមនាំចូលរយៈពេល១០ឆ្នាំ ប៉ុន្តែអនុញ្ញាតឱ្យក្រុមហ៊ុន SK Innovation នាំចូលគ្រឿងបង្គុំផលិតអាគុយ សម្រាប់កម្មវិធីរថយន្តអគ្គិសនី EV F-150 របស់ក្រុមហ៊ុន Ford រយៈពេល៤ឆ្នាំ និងរថយន្តអគ្គិសនី Volkswagen រយៈពេល២ឆ្នាំ។
ក្រុមហ៊ុន SK Innovation បានប្តេជ្ញាដកខ្លួនចេញ ពីរោងចក្រផលិតអាគុយតម្លៃ២,៦ពាន់លានដុល្លាររបស់ខ្លួន ដែលកំពុងស្ថិតក្រោមការសាងសង់ ប្រសិនបើសេក្ដីសម្រេចរបស់គណៈកម្មការពាណិជ្ជកម្មអន្តរជាតិ មិនត្រូវបានកែប្រែទេនោះ។
គណៈកម្មការពាណិជ្ជកម្មអន្តរជាតិ ក៏បានបន្ទោសក្រុមហ៊ុន SK Innovation ផងដែរចំពោះ “ការប្រព្រឹត្តខុសធ្ងន់ធ្ងរ” និងការបំផ្លាញចោលឯកសារនានា ក្រោមបញ្ជារបស់នាយកប្រតិបត្តិ។
ទោះជាយ៉ាងណា ក្រុមហ៊ុន Ford ក្រុមហ៊ុន Volkswagen ក្រុមហ៊ុន LG Chem និងក្រុមហ៊ុន SK Innovation បានបដិសេធមិនធ្វើអត្ថាធិប្បាយឡើយជុំវិញករណីនេះ៕
